اپنے دور کے کامیاب ہدایت کار پرویز ملک کو اس دنیا سے رخصت ہوئے 12 برس ہو گئے ہیں-
باغی ٹی وی :پرویز ملک 1937 کو کراچی میں پیدا ہوئے انہوں نے ابتدائی تعلیم کراچی مکمل کی بعد ازاں وہ فلمساز و اداکار وحید مراد کے فلمساز ادارے سے وابستہ ہوگئے اور بہ حیثیت ہدایت کار فلم ’ہیرا پتھر‘ بنائی جسے ملک بھر میں غیر معمولی کامیابی اور مقبولیت حاصل ہوئی۔
بعد ازاں انہوں نے وحید مراد کے ساتھ فلم ’ارمان‘ بنائی اس فلم کو بھی زبردست پذیرائی ملی فلم’ارمان‘ کو یہ اعزاز بھی حاصل ہوا کہ وہ پاکستان کی پہلی پلاٹینم جوبلی قرار پائی۔
پرویز ملک نے بطور ہدایت کار 20 سے زائد فلمیں بنائیں جن میں زیادہ تر اردو فلمیں تھیں۔ جن میں خاص طور پر ’پاکیزہ‘ ، ’تلاش‘ ، ’ہم دونوں‘،’قربانی‘ ، ’غریبوں کا بادشاہ‘ اور ’پہچان‘ قابل ذکر ہیں۔
پرویز ملک کو 1966 میں فلم’ارمان‘ اور 1981 میں فلم’قربانی‘ کے لیے بہترین ہدایت کار کے نگار ایوارڈ سے بھی نوازا جا چکا ہے۔ وہ 18 نومبر 2008 کو اس دنیا سے رخصت ہو گئے تھے-