بھارت زیادہ دیر مقبوضہ کشمیرپر غاصبانہ قبضہ برقرار نہیں رکھ سکے گا،خالد مسعود سندھو

مرکزی مسلم لیگ کے صدر خالد مسعود سندھو نے کہا ہے کہ 27 اکتوبر تاریخ کشمیر کا ایک سیاہ باب ہے، وہ دن جب بھارت نے اپنی افواج کو وادیٔ کشمیر میں داخل کر کے ظلم و جبر کا نیا سلسلہ شروع کیا، حالانکہ کشمیری عوام پہلے ہی پاکستان کے ساتھ اپنے الحاق کا فیصلہ سنا چکے تھے،کشمیر پاکستان کی شہہ رگ ،قربانیاں رائیگاں نہیں جائیں گی،

خالد مسعود سندھو کا کہنا تھا کہ بھارت جو دنیا کے سامنے خود کو جمہوریت کا علمبردار اور سیکولرازم کا پیکر ظاہر کرتا ہے، وہی بھارت آج وادیٔ کشمیر میں آٹھ لاکھ مسلح افواج کے ذریعے انسانیت کی تذلیل اور بنیادی حقوق کی پامالی میں مصروف ہے،اقوامِ متحدہ جو انسانی حقوق کے تحفظ کا دعویٰ کرتی ہے، اس کی خاموشی ظلم کی تائید کے مترادف ہے،کشمیری قوم کی قربانیاں رنگ لانے والی ہیں، اور وہ دن دور نہیں جب وادیٔ کشمیر میں آزادی کا سورج طلوع ہوگا،کشمیر کی تاریخ بھارت کے ظلم و ستم، لوٹ مار، گھروں کی تباہی اور خواتین کی عصمت دری کے واقعات سے بھری پڑی ہے، مگر ان مظالم نے کشمیریوں کے جذبۂ حریت میں کبھی لغزش پیدا نہیں کی،بھارت نے اقوامِ متحدہ میں کشمیریوں کو حقِ خودارادیت دینے کا جو وعدہ کیا تھا، عالمی برادری کو چاہئے کہ اس وعدے کی تکمیل کے لیے بھارت پر دباؤ بڑھائے۔
،کشمیریوں کے ساتھ ہمارا کلمے کا رشتہ ہے، پاکستان زندہ باد کے نعرے لگانے والے کشمیری اور پاکستانی مسلمانوں کا خون ایک ہو چکا ہے، انہیں کوئی طاقت ایک دوسرے سے جدا نہیں کر سکتی۔