کراچی میں دہشتگردی کے خطرناک منصوبے کا انکشاف،ملزمان گرفتار،بارودبرآمد

کراچی میں دہشت گردی کا بڑا منصوبہ ناکام بنادیا گیا، انٹیلی جنس بیسڈ کارروائی میں 2 ٹن سے زائد بارودی مواد برآمد کرلیا گیا۔

کراچی سینٹرل پولیس آفس میں ایڈیشنل آئی جی سی ٹی ڈی اور ڈی آئی جی سی ٹی ڈی نے پریس کانفرنس کرتے ہوئے بتایا کہ کراچی میں دہشتگردی کے خطرناک منصوبے کا انکشاف ہوا، انتہائی پیچیدہ اور پیشہ ورانہ کامیاب انٹیلی جنس آپریشن کیا گیا، پریمیئر انٹیلی جنس ایجنسی کی اطلاعات پر بروقت اور فیصلہ کن کارروائی میں 2 ہزار کلو گرام سے زائد تباہ کن بارودی مواد برآمد کرلیا گیا۔پولیس افسران نے بتایا کہ کئی دن کی محنت کے بعد ایک دہشتگرد گرفتار کیا گیا، گرفتار ملزم سے تفتیش کی مدد سے گزشتہ رات مزید 2 دہشتگرد گرفتار کرلیے گئے، گرفتار دہشتگردوں میں جلیل عرف فرید، نیاز عرف کنگ، حمدان عرف فرید شامل ہیں۔

افسران کا کہنا ہے کہ دہشتگردوں کا کراچی میں سویلین اہداف کو نشانہ بنانے کا پلان تھا، دھماکا خیزمواد افغانستان سے اندرون بلوچستان اور پھر کراچی لایا گیا، ہم کراچی کو محفوظ رکھنے میں کامیاب ہوئے۔

وزیر مملکت داخلہ طلال چوہدری نے کہا کہ قانون نافذ کرنے والوں نے بڑی اور کامیاب کارروائی کی، کامیاب آپریشن میں مجید بریگیڈ کے کارندے پکڑے گئے۔حکام کا کہنا ہے کہ دہشتگرد نیٹ ورک کے تانے بانے بشیر زیب، بی ایل اے اور مجید بریگیڈ سے ملتے ہیں، بھارتی پراکسیز بی ایل اے اور بی ایل ایف افغانستان میں محفوظ ٹھکانے استعمال کرتی ہیں۔