ڈیرہ غازی خان(باغی ٹی وی،سٹی رپورٹر)شہر ڈیرہ غازی خان میں وزیر اعلیٰ پنجاب کے ویژن “ستھرا پنجاب” کے مطابق صفائی و ستھرائی کے نظام کو مزید بہتر اور مؤثر بنانے کے لیے ڈائیوو ویسٹ مینجمنٹ کے کوآرڈینیٹر عبداللہ عباسی اور تحصیل منیجر رانا عثمان نے اپنے سپر وائزرز کے ہمراہ شہر کے مختلف علاقوں کا خصوصی دورہ کیا۔
دورے کے دوران صفائی ستھرائی کی مجموعی صورتحال، کوڑا کرکٹ کی بروقت منتقلی، فیلڈ اسٹاف کی کارکردگی اور مشینری کے مؤثر استعمال کا تفصیلی جائزہ لیا گیا۔ افسران نے موقع پر موجود عملے کو ہدایات جاری کرتے ہوئے کہا کہ عوام کو صاف اور صحت مند ماحول فراہم کرنا حکومتِ پنجاب کی اولین ترجیح ہے۔
اس موقع پر کوآرڈینیٹر عبداللہ عباسی نے کہا کہ وزیر اعلیٰ پنجاب کے ویژن پر مکمل عملدرآمد کے لیے ڈائیوو ویسٹ مینجمنٹ کی ٹیم دن رات مصروفِ عمل ہے اور صفائی کے نظام میں کسی بھی قسم کی غفلت ہرگز برداشت نہیں کی جائے گی۔
تحصیل منیجر رانا عثمان نے فیلڈ اسٹاف کو ہدایت کی کہ صفائی کے معیار کو ہر صورت برقرار رکھا جائے اور عوامی شکایات کا فوری اور مؤثر ازالہ یقینی بنایا جائے۔
دورے کے دوران شہریوں نے صفائی کے بہتر انتظامات پر اطمینان کا اظہار کرتے ہوئے حکومت پنجاب اور ڈائیوو ویسٹ مینجمنٹ کی کارکردگی کو سراہا۔