متحدہ عرب امارات کے صدر کے سفارتی مشیر ڈاکٹر انور قرقاش نے کہا ہے کہ غزہ اور ایران کے مسائل کا حل طاقت نہیں بلکہ سفارتکاری ہے۔ انہوں نے دبئی سمٹ میں گفتگو کرتے ہوئے بتایا کہ غزہ میں سیاسی استحکام اس وقت تک ممکن نہیں جب تک فلسطینی ریاست کے قیام اور اسرائیلی سلامتی دونوں محاذوں پر بیک وقت پیش رفت نہ ہو، جو علاقائی اور عالمی تعاون سے ممکن ہے۔
انور قرقاش نے کہا کہ ابراہیمی معاہدوں کے ذریعے خطے میں امن کے فروغ کا کردار جاری رہے گا اور خطہ طاقت کے استعمال یا بار بار کی محاذ آرائی برداشت نہیں کر سکتا۔
انہوں نے ایران کے ساتھ کشیدگی کے حل کے لیے سیاسی معاہدے کی ضرورت پر زور دیا اور کہا کہ ایران کو امریکا سے براہِ راست مذاکرات کر کے معاہدے تک پہنچنا چاہیے تاکہ اپنی معیشت کی تعمیر نو اور جوہری مسئلے سمیت دیگر اہم امور پر پیش رفت ممکن ہو۔
اماراتی مشیر نے مزید کہا کہ متحدہ عرب امارات پرعزم اور بلند اہداف پر مبنی معاشی پالیسی جاری رکھے گا اور انتہا پسندی، بشمول اخوان المسلمون کے خلاف اقدامات بھی جاری رہیں گے۔
غزہ اور ایران کا حل طاقت نہیں، سفارتکاری ہے, یو اے ای
