ایران کے سکیورٹی چیف علی لاریجانی کو مار دیا، اسرائیلی دعویٰ

اسرائیلی وزیر دفاع اسرائیل کٹز نے دعویٰ کیا ہے کہ اسرائیلی حملوں میں ایران کے سکیورٹی چیف علی لاریجانی کو قتل کردیا گیا ہے۔

اسرائیلی وزیر دفاع کے مطابق ایرانی سیکیورٹی چیف علی لاریجانی کوکل رات کے حملوں میں نشانہ بنایا گیا۔،اس سے قبل اسرائیلی میڈیا کی خبر میں بتایا گیا تھا کہ اسرائیلی فوج نے علی لاریجانی کو نشانہ بنایا ہے تاہم فوری طور پر واضح نہیں کہ آیا علی لاریجانی مارے گئے یا زخمی ہوئے،دوسری جانب ایرانی میڈیا نے اسرائیلی میڈیا کے دعوے کی تردید کرتے ہوئے کہا کہ بہت جلد ایرانی سکیورٹی چیف علی لاریجانی کا پیغام جاری کیا جائے گا۔

دوسری جانب علی لاریجانی کے ٹویٹر ہینڈل سے ٹویٹ ہوا جس میں اُن کے ہاتھ سے لکھا خط ٹویٹ کیا گیا، خط میں لکھا گیا ہے کہ’’ شاید ہم دنیا میں کوئی بڑا کام انجام نہ دے سکے اور زندگی میں کوئی قابلِ قدر چیز حاصل نہ کر سکے، ہم نے زمانے میں کام کیا، اللہ کے نام پر ہماری زندگی محنت اور کوشش میں گزری، ہم بے سرو سامانی میں جیتے رہے اور دوسروں کی خدمت اور محبت میں لگے رہے، ہم نے کبھی کسی کو اذیت نہیں دی، اگرچہ ہمارے پاس کچھ نہیں تھا، ہماری خواہش ہے کہ اسی راہ میں پروردگار کا سایۂ لطف ہم پر قائم رہے‘‘