روس کی سرکاری نیوکلیئر کمپنی ’روساتم‘ کے سی ای او، الیکسی لیخاچیف نے اس بات کی تصدیق کی ہے کہ ان کا ملک ایران کے افزودہ یورینیئم کے ذخیرے کو سنبھالنے کے لیے تیار ہے، اور یہ پیشکش ابھی تک میز پر ہے۔ یہ بیان ایسے وقت میں سامنے آیا ہے جب ایران اور امریکا کے درمیان جوہری مذاکرات انتہائی نازک مرحلے میں داخل ہو چکے ہیں۔
الیکسی لیخاچیف نے کہا کہ روساتم ایران اور امریکا کے درمیان ہونے والے مذاکرات پر گہری نظر رکھے ہوئے ہے۔ انہوں نے یاد دلایا کہ 2015 میں بھی روس نے ایران کی درخواست پر افزودہ یورینیم کو اپنے ملک منتقل کیا تھا، اور وہ آج بھی اس نازک معاملے میں تکنیکی اور اعتمادی مدد فراہم کرنے کے لیے تیار ہیں،یہ محض ایک تکنیکی مسئلہ نہیں بلکہ اعتماد کی بحالی کا بھی معاملہ ہے، جس کے لیے روس تیار ہے۔