کراچی کے علاقے شارع فیصل پر پولیس آفس کے سامنے فلائی اوور کے نیچے اچانک آگ بھڑک اٹھی جس کے نتیجے میں 20 سے زائد موٹر سائیکلیں جل کر خاکستر ہو گئیں۔
رپورٹس کے مطابق یہ موٹر سائیکلیں مختلف دفاتر میں کام کرنے والے افراد کی تھیں جو روزانہ کی بنیاد پر یہاں اپنی گاڑیاں پارک کرتے تھے۔ آگ لگنے کے بعد علاقے میں خوف و ہراس پھیل گیا جبکہ شہریوں نے اپنی مدد آپ کے تحت آگ بجھانے کی کوشش بھی کی۔
علاقہ مکینوں کا کہنا ہے کہ فلائی اوور کے نیچے منشیات کے عادی افراد کا ٹھکانہ ہے اور خدشہ ظاہر کیا جا رہا ہے کہ آگ کسی نشہ آور شے کے استعمال یا جلانے کے باعث لگی۔ ابتدائی اطلاعات کے مطابق آگ پہلے جھاڑیوں میں لگی اور پھر تیزی سے پھیل کر قریب کھڑی موٹر سائیکلوں کو اپنی لپیٹ میں لے لیا۔
واقعے کے بعد پولیس اور فائر بریگیڈ کی ٹیمیں موقع پر پہنچ گئیں اور آگ پر قابو پا لیا گیا، تاہم اس دوران متعدد موٹر سائیکلیں مکمل طور پر جل چکی تھیں۔
پولیس حکام کا کہنا ہے کہ آگ لگنے کی اصل وجہ جاننے کے لیے تحقیقات شروع کر دی گئی ہیں اور تمام پہلوؤں کا جائزہ لیا جا رہا ہے۔
کراچی میں فلائی اوور کے نیچے آگ، 20 سے زائد موٹر سائیکلیں جل گئیں
