وفاقی دارالحکومت اسلام آبادمیں خلع اور طلاق کے بڑھتے ہوئے رجحان نے تشویش کی لہر دوڑا دی ہے، جہاں فیملی کورٹس میں مقدمات کی تعداد میں غیر معمولی اضافہ ریکارڈ کیا گیا ہے۔
وکلاء کے مطابق منشیات کے بڑھتے استعمال، بے روزگاری، گھریلو تنازعات اور معاشی دباؤ کے باعث میاں بیوی کے درمیان اختلافات بڑھ رہے ہیں، جس کے نتیجے میں خلع اور طلاق کے کیسز میں مسلسل اضافہ دیکھنے میں آ رہا ہے۔میڈیا رپورٹس کے مطابق اسلام آباد کی فیملی کورٹس میں یومیہ 300 سے زائد نئے مقدمات دائر کیے جا رہے ہیں جبکہ خلع اور نان نفقہ کے اوسطاً 38 کیسز فی گھنٹہ درج ہو رہے ہیں،اعداد و شمار کے مطابق رواں سال وفاقی دارالحکومت میں خلع کے مقدمات کی تعداد 45 ہزار سے تجاوز کر چکی ہے، جبکہ ہر ماہ 9 ہزار سے زائد نئے کیسز کا اندراج ہو رہا ہے۔
قانونی ماہرین کا کہنا ہے کہ بڑھتے ہوئے سماجی اور معاشی مسائل خاندانی نظام کو متاثر کر رہے ہیں، جس کے باعث فیملی کورٹس پر بوجھ میں بھی مسلسل اضافہ ہو رہا ہے۔ انہوں نے حکومت سے مطالبہ کیا ہے کہ نوجوانوں کو روزگار کی فراہمی، منشیات کے خاتمے اور خاندانی مشاورت کے مؤثر نظام پر توجہ دی جائے تاکہ اس بڑھتے ہوئے رجحان کو روکا جا سکے۔