ایرانی خبر ایجنسی نے دعویٰ کیا ہے کہ ایران اس وقت امریکا کی جانب سے بھیجے گئے پیغام کا جواب تیار کر رہا ہے جبکہ تہران میں وسیع فریم ورک، اعتماد سازی کے اقدامات اور مختلف اہم نکات پر بات چیت جاری ہے۔
رپورٹ کے مطابق ایران اور امریکا کے درمیان حالیہ سفارتی رابطوں میں بعض معاملات پر اختلافات میں کسی حد تک کمی آئی ہے، تاہم مکمل پیش رفت کے لیے واشنگٹن کی جانب سے جنگ کی دھمکیوں کا خاتمہ ضروری قرار دیا جا رہا ہے۔
ایرانی خبر ایجنسی کے مطابق تہران میں جاری مشاورت میں اعتماد سازی کے مختلف اقدامات زیر غور ہیں تاکہ دونوں ممالک کے درمیان کشیدگی میں کمی لائی جا سکے۔ ذرائع کا کہنا ہے کہ حالیہ پیغامات کے تبادلے نے مذاکراتی ماحول کو نسبتاً نرم کیا ہے، لیکن اب بھی کئی اہم معاملات پر اختلافات برقرار ہیں۔
رپورٹس کے مطابق ایران کا مؤقف ہے کہ سفارتی پیش رفت اسی صورت ممکن ہو سکتی ہے جب امریکا دباؤ اور عسکری دھمکیوں کی پالیسی ترک کرے۔ ایرانی حکام کا کہنا ہے کہ خطے میں امن اور استحکام کے لیے مذاکرات کو سنجیدگی سے آگے بڑھانا ضروری ہے۔
دوسری جانب امریکا کی جانب سے اس حوالے سے باضابطہ ردعمل سامنے نہیں آیا، تاہم دونوں ممالک کے درمیان حالیہ ہفتوں میں سفارتی سرگرمیوں اور ثالثی کی کوششوں میں اضافہ دیکھا گیا ہے۔
عالمی مبصرین کے مطابق اگر مذاکرات میں مزید پیش رفت ہوتی ہے تو اس کے اثرات نہ صرف ایران اور امریکا بلکہ پورے مشرقِ وسطیٰ کی سیاسی اور معاشی صورتحال پر بھی مرتب ہو سکتے ہیں۔
ایران امریکا کے پیغام کا جواب تیار کر رہا ہے، تہران میں مذاکرات جاری
