کراچی کے علاقے اورنگی ٹاؤن سیکٹر ساڑھے 11 میں گھریلو تنازع ایک افسوسناک واقعے میں تبدیل ہو گیا، جہاں ایک شخص نے مبینہ طور پر اپنی بیوی کو قتل کرنے کے بعد خود پولیس تھانے پہنچ کر جرم کا اعتراف کر لیا۔ واقعے نے علاقے میں تشویش کی لہر دوڑا دی جبکہ مقتولہ کے چار بچے ماں کی شفقت سے محروم ہو گئے۔
پولیس کے مطابق ملزم بیوی کو قتل کرنے کے بعد براہ راست تھانے پہنچا اور واقعے کی اطلاع دی۔ اطلاع ملتے ہی پولیس فوری طور پر جائے وقوع پر پہنچی اور خاتون کی لاش کو تحویل میں لے کر قانونی کارروائی کا آغاز کیا۔ موقع سے مبینہ آلہ قتل، لوہے کی راڈ بھی برآمد کر لی گئی۔
عدالت میں پیشی کے دوران پولیس نے مؤقف اختیار کیا کہ ملزم ابتدائی تفتیش میں جرم کا اعتراف کر چکا ہے۔ تفتیشی حکام کے مطابق مزید شواہد اکٹھے کرنے، آلہ قتل کی فرانزک جانچ اور ملزم کے ممکنہ کریمنل ریکارڈ کی پڑتال کے لیے جسمانی ریمانڈ درکار ہے۔ عدالت نے ملزم کو دو روزہ جسمانی ریمانڈ پر پولیس کے حوالے کر دیا۔
پولیس حکام کا کہنا ہے کہ ابتدائی تحقیقات کے مطابق میاں بیوی کے درمیان گھریلو جھگڑے چل رہے تھے۔ مبینہ طور پر اسی تنازع کے دوران ملزم نے لوہے کی راڈ سے وار کر کے خاتون کو قتل کر دیا۔ ڈیوٹی افسر کے مطابق ملزم نے ذاتی رنجش اور گھریلو اختلافات کی بنیاد پر قتل کا اعتراف بھی کیا ہے۔
مقتولہ چار بچوں کی ماں تھی، جن میں دو بیٹے اور دو بیٹیاں شامل ہیں۔ پولیس کے مطابق واقعے کے وقت گھر میں کوئی اور فرد موجود نہیں تھا، جس کی وجہ سے قتل کی واردات بغیر کسی مزاحمت کے انجام دی گئی۔
قانون نافذ کرنے والے ادارے مختلف پہلوؤں سے تفتیش کر رہے ہیں تاکہ واقعے کی مکمل وجوہات اور پس منظر سامنے لایا جا سکے۔ پولیس کا کہنا ہے کہ شواہد اور فرانزک رپورٹس کی روشنی میں چالان مکمل کر کے عدالت میں پیش کیا جائے گا۔
سماجی حلقوں نے واقعے پر افسوس کا اظہار کرتے ہوئے گھریلو تنازعات کے حل کے لیے مؤثر مشاورت اور آگاہی پروگراموں کی ضرورت پر زور دیا ہے تاکہ ایسے المناک واقعات کی روک تھام ممکن بنائی جا سکے۔
اورنگی ٹاؤن میں بیوی کو قتل کرنے والے ملزم کا جسمانی ریمانڈ منظور
