وزیراعظم شہباز شریف کی آج صدر آصف علی زرداری سے اہم ملاقات متوقع ہے، جس میں وفاقی بجٹ، ملک کی مجموعی سیاسی صورتحال اور آزاد کشمیر کے حالیہ معاملات پر تفصیلی مشاورت کیے جانے کا امکان ہے۔
ذرائع کے مطابق ملاقات ایوانِ صدر میں ہوگی، جہاں آئندہ مالی سال کے وفاقی بجٹ سے متعلق اہم امور زیر غور آئیں گے۔ حکومت کی معاشی پالیسی، ترقیاتی منصوبوں، اتحادی جماعتوں کے تحفظات اور بجٹ تجاویز پر بھی تبادلہ خیال متوقع ہے۔
اطلاعات کے مطابق آزاد کشمیر کی موجودہ سیاسی صورتحال بھی ملاقات کے ایجنڈے میں شامل ہوگی۔ حالیہ دنوں میں آزاد کشمیر میں سیاسی کشیدگی، احتجاجی سرگرمیوں اور آئینی معاملات کے باعث پیدا ہونے والی صورتحال پر دونوں رہنما غور کریں گے۔
ذرائع کا کہنا ہے کہ نائب وزیراعظم اور وزیر خارجہ اسحاق ڈار بھی وزیراعظم کے ہمراہ ایوانِ صدر جائیں گے اور ملاقات میں شریک ہوں گے۔ اسحاق ڈار ممکنہ طور پر معاشی صورتحال، بجٹ حکمت عملی اور اتحادی جماعتوں سے جاری مشاورت کے حوالے سے بریفنگ دیں گے۔
سیاسی مبصرین کے مطابق یہ ملاقات ایسے وقت میں ہو رہی ہے جب وفاقی بجٹ پیش کیے جانے میں چند روز باقی ہیں اور حکومت اتحادی جماعتوں کے ساتھ مشاورت کے عمل کو حتمی شکل دے رہی ہے۔ پاکستان پیپلز پارٹی کی جانب سے بھی بجٹ اور ترقیاتی فنڈز کے حوالے سے مختلف تجاویز سامنے آ چکی ہیں۔
توقع کی جا رہی ہے کہ ملاقات میں آئندہ سیاسی حکمت عملی، پارلیمانی معاملات اور قومی اہمیت کے دیگر امور پر بھی گفتگو ہوگی۔ حکومتی اور اتحادی قیادت کے درمیان رابطوں کو موجودہ سیاسی ماحول میں انتہائی اہم قرار دیا جا رہا ہے۔
وزیراعظم اور صدر زرداری کی آج اہم ملاقات متوقع
