فیفا فٹبال ورلڈ کپ 2026 کے پہلے کوارٹر فائنل میں فرانس نے شاندار کھیل کا مظاہرہ کرتے ہوئے مراکش کو 0-2 سے شکست دے کر سیمی فائنل کے لیے کوالیفائی کر لیا۔ اس کامیابی کے ساتھ فرانس ٹورنامنٹ کے سیمی فائنل میں پہنچنے والی پہلی ٹیم بن گئی، جبکہ فرانسیسی ٹیم مسلسل تیسری مرتبہ ورلڈ کپ کے آخری چار میں جگہ بنانے میں بھی کامیاب رہی۔
بوسٹن اسٹیڈیم میں کھیلے گئے سنسنی خیز مقابلے میں فرانسیسی کپتان کیلیان ایمباپے اور عثمان ڈیمبیلے نے اپنی ٹیم کی کامیابی میں کلیدی کردار ادا کیا۔ دونوں کھلاڑیوں نے دوسرے ہاف میں شاندار گول اسکور کرکے فرانس کی فتح یقینی بنائی۔میچ کے آغاز سے ہی فرانس نے جارحانہ حکمت عملی اپنائی اور مراکش کے دفاع پر مسلسل دباؤ برقرار رکھا۔ ابتدائی منٹوں میں فرانس کو اس وقت سنہری موقع ملا جب ایمباپے کو پنالٹی ایریا میں گرائے جانے پر ریفری نے پنالٹی کک دی، تاہم مراکش کے گول کیپر نے بہترین انداز میں ایمباپے کی شاٹ روک کر اپنی ٹیم کو ابتدائی نقصان سے بچا لیا۔پہلے ہاف میں دونوں ٹیموں کے درمیان سخت مقابلہ دیکھنے میں آیا اور متعدد مواقع بننے کے باوجود کوئی بھی ٹیم گول کرنے میں کامیاب نہ ہو سکی، جس کے باعث وقفے تک مقابلہ بغیر کسی گول کے برابر رہا۔
دوسرے ہاف میں بھی فرانس نے حملے جاری رکھے اور بالآخر 60ویں منٹ میں کیلیان ایمباپے نے شاندار فنش کے ذریعے اپنی ٹیم کو برتری دلا دی۔ صرف چھ منٹ بعد 66ویں منٹ میں عثمان ڈیمبیلے نے خوبصورت گول اسکور کرکے فرانس کی برتری 0-2 کر دی، جس کے بعد مراکش کے لیے واپسی انتہائی مشکل ہو گئی۔میچ کے 82ویں منٹ میں مراکش کو فری کک ملی، تاہم فرانسیسی گول کیپر نے بہترین سیو کرتے ہوئے گول کی کوشش ناکام بنا دی۔ اس کے بعد بھی مراکش کو ایک اور اچھا موقع ملا لیکن وہ اسے بھی گول میں تبدیل نہ کر سکا۔اختتامی سیٹی بجتے ہی فرانس نے 0-2 سے کامیابی حاصل کرتے ہوئے سیمی فائنل میں اپنی جگہ پکی کر لی، جبکہ مراکش کا ورلڈ کپ کا سفر کوارٹر فائنل میں اختتام پذیر ہو گیا۔
اس میچ میں گول کرنے کے بعد کیلیان ایمباپے کے رواں ورلڈ کپ میں مجموعی گولوں کی تعداد 8 ہو گئی ہے۔ اس کے ساتھ ہی وہ فیفا ورلڈ کپ کی تاریخ میں دو مختلف ایڈیشنز میں 8، 8 گول کرنے والے پہلے فٹبالر بن گئے ہیں۔اس سے قبل ایمباپے نے قطر میں کھیلے گئے فیفا ورلڈ کپ 2022 میں بھی مجموعی طور پر 8 گول اسکور کیے تھے، جبکہ 2026 کے ورلڈ کپ میں بھی انہوں نے یہی سنگِ میل عبور کرکے ایک منفرد عالمی ریکارڈ اپنے نام کر لیا۔