اقوام متحدہ میں پاکستان کے مستقل مندوب عاصم افتخار احمد نے نوجوانوں پر زور دیا ہے کہ وہ مستقبل کے عالمی اداروں اور نئی سوچ کی تشکیل میں فعال کردار ادا کریں-
سماجی رابطے کی ویب سائٹ ایکس پر جاری اپنے بیان میں عاصم افتخار احمد نے بتایا کہ انہوں نے اقوام متحدہ میں منعقدہ کانفرنس کے نوجوان شرکا سے خطاب میں انہوں نے نوجوانوں کو مستقبل کے سفارت کار، پالیسی ساز، کھلاڑی، ماہرین تعلیم، کاروباری شخصیات، جدت کار اور کمیونٹی رہنما قرار دیتے ہوئے کہا کہ وہ آنے والے کل کے اداروں اور نظریات کی تشکیل میں اپنا مؤثر کردار ادا کریں۔
انہوں نے نوجوانوں کو تجسس، ہمدردی اور مختلف آرا کو کھلے دل سے سننے اور قبول کرنے کی تلقین کرتے ہوئے کہا کہ تنوع کو اپنانا اور مختلف نقطۂ نظر کو سمجھنا مؤثر قیادت کی بنیادی خصوصیات ہیں، بین الاقوامی تعلقات کی کئی نمایاں کامیابیاں ان افراد کی مرہونِ منت ہیں جنہوں نے رکاوٹوں کے باوجود پل تعمیر کیے، اختلافات کے باوجود مشترکہ نکات تلاش کیے اور تعاون کے راستے اختیار کیے۔
عاصم افتخار احمد نے اس امید کا اظہار کیا کہ مستقبل انہی لوگوں کے ہاتھوں تشکیل پائے گا جو تقسیم کے بجائے تعاون، محاذ آرائی کے بجائے مکالمے اور خوف کے بجائے امید کا راستہ اختیار کریں گے، انہوں نے نوجوانوں پر زور دیا کہ وہ مثبت سوچ، باہمی احترام اور مشترکہ مقاصد کے ذریعے ایک بہتر اور پُرامن عالمی مستقبل کی تعمیر میں اپنا کردار ادا کریں۔