ایرانی پاسدارانِ انقلاب نے جنگ کے دوران تباہ ہونے والے امریکی اور اسرائیلی طیاروں اور ڈرونز کے مبینہ ملبے کو نمائش کے لیے پیش کردیا ہے۔
ایرانی میڈیا کے مطابق نمائش میں پہلی مرتبہ امریکی ایف 15 ای اسٹرائیک ایگل لڑاکا طیارے کی باقیات بھی دکھائی گئی ہیں۔ نمائش میں طیارے کی ایجیکشن سیٹ، کینوپی اور دم سمیت دیگر حصے شامل ہیں۔ تازہ جاری ہونے والی تصاویر میں ملبے کو زیرِ زمین مقام پر نمائش کے لیے رکھا گیا دکھایا گیا ہے۔ایرانی پاسدارانِ انقلاب کا مؤقف ہے کہ یہ ملبہ ان امریکی اور اسرائیلی طیاروں اور ڈرونز کا ہے جنہیں جنگ کے دوران ایرانی کارروائیوں میں نشانہ بنایا گیا۔
ایران اس سے قبل بھی امریکی ایف 35 اسٹیلتھ لڑاکا طیاروں کو تباہ کرنے کے دعوے کرچکا ہے، تاہم امریکی حکام نے ان دعوؤں کی تردید کی ہے۔ 30 جولائی کو ایرانی پاسدارانِ انقلاب نے اردن کے الازرق ایئربیس پر حملے کے دوران تین امریکی ایف 35 طیارے تباہ کرنے کا دعویٰ کیا تھا، جسے امریکی فوج نے مسترد کرتے ہوئے کہا تھا کہ امریکی طیاروں کو نقصان نہیں پہنچا۔تازہ نمائش کو ایران کی جانب سے جنگ کے دوران امریکی اور اسرائیلی فضائی طاقت کو پہنچنے والے مبینہ نقصانات کو اجاگر کرنے کی کوشش قرار دیا جا رہا ہے۔ نمائش میں امریکی ایف 15 ای کے علاوہ مختلف ڈرونز کا ملبہ بھی شامل ہے۔