بہاولنگر:مرکزی مسلم لیگ کے زیر اہتمام عوام بچاؤ تحریک کے سلسلہ میں سٹی چوک بہاولنگر میں استحکامِ پاکستان کانفرنس کا انعقاد کیا گیا، جس میں عوام کی بڑی تعداد نے شرکت کی۔ کانفرنس کے دوران شرکاء میں بھرپور جوش و جذبہ اور حب الوطنی کا اظہار دیکھنے میں آیا۔
کانفرنس میں پاکستان مرکزی مسلم لیگ ضلع بہاولنگر کے جنرل سیکرٹری حافظ امیر حمزہ رافع نے خصوصی شرکت کی۔ اس موقع پر صدر ڈویژن بہاولپور عبدالغفار بہاولپوری، مولانا علامہ ناصر مدنی سمیت دیگر مقررین نے خطاب کیا اور پاکستان کے استحکام، قومی یکجہتی اور ملکی ترقی کے حوالے سے اپنے خیالات کا اظہار کیا۔کانفرنس کے خصوصی انتظامات پاکستان مرکزی مسلم لیگ سٹی بہاولنگر کے جنرل سیکرٹری سعید عامر کی نگرانی میں کیے گئے۔ شرکاء نے ملک کی سلامتی، خوشحالی اور مضبوط مستقبل کے لیے اپنے عزم کا اظہار کیا۔مقررین نے کہا کہ پاکستان کی ترقی اور استحکام کے لیے قومی اتحاد، باہمی بھائی چارے اور اجتماعی شعور کو فروغ دینا وقت کی اہم ضرورت ہے۔ کانفرنس میں اس عزم کا اعادہ کیا گیا کہ ملکی سلامتی، خودمختاری اور قومی یکجہتی کے لیے ہر سطح پر مثبت کردار ادا کیا جائے گا۔