مظفرآباد: پاکستان پیپلز پارٹی آزاد کشمیر نے پارٹی ڈسپلن کی خلاف ورزی پر دو اہم رہنماؤں کے خلاف کارروائی کرتے ہوئے ان کی پارٹی رکنیت ختم کردی۔
پیپلز پارٹی آزاد کشمیر کے صدر چودھری محمد یاسین نے سردار خالد محمود چغتائی اور سردار ماجد رزاق کی پارٹی رکنیت ختم کرنے کا فیصلہ کیا، جس کے بعد دونوں رہنما پارٹی کی رکنیت اور عہدوں سے محروم ہوگئے ہیں۔
پارٹی کی جانب سے جاری نوٹیفکیشن کے مطابق سردار خالد محمود چغتائی پیپلز پارٹی آزاد کشمیر کے نائب صدر جبکہ سردار ماجد رزاق سینٹرل ایگزیکٹو کمیٹی کے رکن تھے۔ دونوں رہنماؤں کے خلاف کارروائی عام انتخابات 2026 کے دوران پارٹی ڈسپلن اور پارٹی فیصلوں کی خلاف ورزی پر کی گئی ہے۔
نوٹیفکیشن میں کہا گیا ہے کہ دونوں رہنماؤں نے انتخابات کے دوران پارٹی کی ہدایات اور فیصلوں کی خلاف ورزی کی، جس پر پارٹی قیادت نے ان کے خلاف تنظیمی کارروائی کا فیصلہ کیا۔
پیپلز پارٹی آزاد کشمیر کے سیکرٹری جنرل فیصل ممتاز راٹھور کے دستخط سے دونوں رہنماؤں کی پارٹی رکنیت ختم کرنے کا باضابطہ نوٹیفکیشن جاری کردیا گیا ہے۔
پارٹی ذرائع کے مطابق قیادت نے واضح کیا ہے کہ پارٹی نظم و ضبط اور تنظیمی فیصلوں کی خلاف ورزی کسی صورت برداشت نہیں کی جائے گی اور آئندہ بھی پارٹی پالیسی سے انحراف کرنے والے رہنماؤں کے خلاف قواعد کے مطابق کارروائی کی جائے گی۔
رکنیت ختم کیے جانے کے فیصلے کے بعد آزاد کشمیر میں پیپلز پارٹی کی اندرونی تنظیمی صورتحال بھی سیاسی حلقوں کی توجہ کا مرکز بن گئی ہے۔