سابق وزیراعظم عمران خان کی سابق اہلیہ اور فلم پروڈیوسر جمائما گولڈ اسمتھ نے کیمرون او ریلی سے دوسری شادی کرلی۔
برطانوی اخبار ڈیلی میل نے اپنی رپورٹ میں دعویٰ کیا ہے کہ جمائما گولڈ اسمتھ نے ہفتے کے اختتام پر کیمرون اوریلی کے ساتھ شادی کی جس کی تصدیق جمائما کے بھائی بین گولڈ اسمتھ نے بھی کی ہےجمائما گولڈ اسمتھ کی عمر 52 سال جبکہ ان کے شوہر کیمرون او ریلی کی عمر 62 سال ہے، کیمرون آئرش آسٹریلوی شہری ہیں اور وہ معروف میڈیا شخصیت اور سابق رگبی اسٹار سر انتھونی او ریلی کے بیٹے ہیں۔
رپورٹ کے مطابق جمائما اور کیمرون کی منگنی رواں سال مئی میں سامنے آئی تھی، دونوں کے درمیان تقریباً ایک سال سے تعلق قائم تھا،جمائما کے بھائی بین گولڈ اسمتھ نے گزشتہ رات جوڑے کی شادی کی تصدیق کی جبکہ ان کی اہلیہ جمائما جونز نے آن لائن پیغام میں اسے خوشی کا دن قرار دیا۔
جمائما اور کیمرون کی ملاقات اس وقت ہوئی جب کیمرون متعدد ڈاکیومنٹریز اور فلموں میں ایگزیکٹو پروڈیوسر کے طور پر کام کررہے تھے دونوں پہلے دوست بنے اور بعد میں ان کی دوستی رومانوی تعلق میں تبدیل ہوگئی،جمائما کے ایک قریبی دوست نے اس سے قبل بتایا تھا کہ دونوں ایک دوسرے کو کافی عرصے سے جانتے تھے ان کی ملاقات کام کے سلسلے میں ہوئی تھی اور رومانوی تعلق سے پہلے وہ کچھ عرصے تک دوست رہے۔
ذرائع کے مطابق کیمرون انتہائی نجی زندگی پسند شخصیت ہیں اور جمائما بھی ان کی نجی زندگی کا تحفظ کرنا چاہتی ہیں،کیمرون او ریلی کے چار بچے ہیں جبکہ جمائما کے سابق وزیراعظم عمران خان سے دو بیٹے، سلیمان اور قاسم ہیں،عمران خان سے طلاق کے بعد جمائما نے اداکار ہیو گرانٹ، کامیڈین رسل برانڈ اور ’دی کراؤن‘ کے اسکرپٹ رائٹر پیٹر مورگن سمیت معروف شخصیات کے ساتھ تعلقات رکھے۔
جمائما کی دوسری شادی ان کی والدہ لیڈی اینابیل گولڈ اسمتھ کے انتقال کے تقریباً ایک سال بعد ہوئی ہے۔ لیڈی اینابیل لندن کے معروف سماجی حلقوں میں نمایاں مقام رکھتی تھیں، جبکہ جمائما کے والد ارب پتی کاروباری شخصیت سر جیمز گولڈ اسمتھ 1997 میں انتقال کرگئے تھے۔
دوسری جانب کیمرون او ریلی نے آکسفورڈ یونیورسٹی سے تعلیم حاصل کی اور اپنے والد کے میڈیا کاروبار، انڈیپنڈنٹ نیوز اینڈ میڈیا میں تقریباً ایک دہائی تک کام کیا بعد میں انہوں نے آسٹریلوی گروپ اے پی این نیوز اینڈ میڈیا میں بھی خدمات انجام دیں اور 2000 میں چیف ایگزیکٹو کے عہدے سے الگ ہوگئے۔
2003 میں کیمرون نے نجی ایکویٹی فنڈ ’بیارڈ کیپیٹل‘ قائم کیا۔ انہوں نے سوئس میٹرنگ کمپنی لینڈس اینڈ گیر خریدی اور اس کے چیف ایگزیکٹو کے طور پر بھی کام کیا۔2011 میں یہ کمپنی جاپانی کمپنی توشیبا کو 2.3 ارب ڈالر میں فروخت کردی گئی۔