وفاقی حکومت کی وزارتوں میں استعمال ہونے والے ای آفس سسٹم کو ممکنہ سائبر حملوں سے محفوظ بنانے کے لیے اہم سیکیورٹی ایڈوائزری جاری کی گئی ہے۔
ایڈوائزری میں تمام وزارتوں کو ہدایت کی گئی ہے کہ وہ جدید سیکیورٹی اقدامات فوری طور پر نافذ کریں تاکہ حساس سرکاری ڈیٹا اور سرکاری نظام کو ہیکنگ یا سائبر خطرات سے محفوظ رکھا جا سکے۔رپورٹ کے مطابق ایڈوائزری میں کہا گیا ہے کہ وفاقی وزارتوں کے نیٹ ورک کی مسلسل نگرانی کے لیے نیکسٹ جنریشن فائر وال نصب کیے جائیں اور ہر وزارت میں ڈائریکٹر سائبر سیکیورٹی کے عہدے پر ماہر افسر تعینات کیا جائے، جو ڈیجیٹل سیکیورٹی کے معاملات کی براہ راست نگرانی کرے۔ایڈوائزری میں مزید تجویز دی گئی ہے کہ نیشنل انفارمیشن ٹیکنالوجی بورڈ میں ایک خصوصی سائبر سیکیورٹی ٹیم قائم کی جائے، جو ای آفس سسٹم کی حفاظت، مانیٹرنگ اور ممکنہ سائبر حملوں کی بروقت نشاندہی اور روک تھام کے لیے کام کرے۔
سیکیورٹی ہدایات کے مطابق تمام متعلقہ وزارتوں اور سرکاری اداروں کو 30 دن کے اندر اندر ان حفاظتی اقدامات پر مکمل عملدرآمد یقینی بنانے کی ہدایت کی گئی ہے۔ حکام کا کہنا ہے کہ حالیہ عالمی سائبر خطرات کے پیش نظر سرکاری ڈیجیٹل نظام کو محفوظ بنانا انتہائی ضروری ہے۔رپورٹ کے مطابق نیشنل سرٹ کے ڈائریکٹر جنرل نے سیکیورٹی سفارشات 43 وفاقی وزارتوں اور اہم سرکاری محکموں کو ارسال کر دی ہیں، جبکہ وزارتوں کے ساتھ رابطہ اور عملدرآمد کی نگرانی کی ذمہ داری ڈائریکٹر نیشنل سرٹ خرم جاوید کو سونپی گئی ہے۔حکام کے مطابق اس اقدام کا مقصد حکومتی ڈیجیٹل انفراسٹرکچر کو مضبوط بنانا اور سرکاری نظام کو ممکنہ سائبر حملوں سے محفوظ رکھنا ہے۔