سرحدی علاقے میں سیکیورٹی فورسز کی مؤثر اور بروقت کارروائی کے نتیجے میں شدت پسند عناصر کے ٹھکانے مسمار کر دیے گئے جبکہ متعدد اہم چوکیوں کا کنٹرول حاصل کر لیا گیا۔ سیکیورٹی ذرائع کے مطابق پاک فوج نے پیشہ ورانہ مہارت اور حکمت عملی کے تحت آپریشن کرتے ہوئے دشمن کے عزائم کو ناکام بنا دیا۔
ذرائع کا کہنا ہے کہ وہ عناصر جو سوشل میڈیا اور خفیہ پیغامات کے ذریعے بڑے بڑے دعوے کر رہے تھے، پاک فوج کی پیش قدمی کے سامنے زیادہ دیر ٹھہر نہ سکے۔ کارروائی شروع ہوتے ہی متعددافغان طالبان اہلکارموقع سے فرار ہوگئے جبکہ فائرنگ کے تبادلے میں کئی شدت پسند مارے گئے۔ علاقہ مکینوں نے سیکیورٹی فورسز کی بروقت کارروائی کو سراہا ہے،دفاعی تجزیہ کاروں کے مطابق حالیہ کارروائی نے واضح کر دیا ہے کہ سیکیورٹی فورسز کی پیشہ ورانہ صلاحیت اور قربانیاں ملک میں امن و استحکام کی ضمانت ہیں۔