وزارتِ اطلاعات و نشریات پاکستان کی جانب سے جاری کردہ فیکٹ چیک میں کہا گیا ہے کہ افغان طالبان حکومت کے نام نہاد نائب ترجمان کی طرف سے لگائے گئے الزامات حقیقت کے منافی اور گمراہ کن ہیں۔
بیان کے مطابق یہ دعویٰ دراصل افغان طالبان کی جانب سے پاک افغان سرحد پر شہری آبادی کو نشانہ بنانے کی کارروائی کو چھپانے کی ناکام کوشش ہے اور اپنے ہی عوام کو دھوکہ دینے کے مترادف ہے۔حکومتی بیان میں کہا گیا کہ 15 مارچ 2026 کو تقریباً سہ پہر ساڑھے تین بجے افغان طالبان حکومت نے جان بوجھ کر خیبر پختونخوا کے ضلع باجوڑ کے سالرزئی علاقے کے گاؤں تابستہ لیٹائی میں شہری آبادی کو نشانہ بنایا۔ اس حملے کے نتیجے میں چار بے گناہ شہری شہید جبکہ پانچ سالہ ایک بچہ شدید زخمی ہو گیا۔بیان میں مزید کہا گیا کہ پاک فوج کی جانب سے دہشت گردوں کے خلاف کی جانے والی کارروائیوں کے بارے میں ہمیشہ عوام کو شفاف اور بروقت آگاہ کیا جاتا ہے۔ اسی تناظر میں 14 اور 15 مارچ کی درمیانی شب افغانستان کے شہر قندھار میں صرف دہشت گردوں کے ٹھکانوں، بنیادی ڈھانچے اور تکنیکی آلات کو نشانہ بنایا گیا تھا، جنہیں افغان طالبان حکومت کا “ماسٹر دہشت گرد پراکسی” قرار دیا گیا۔ ان کارروائیوں کی ویڈیوز اور تصاویر بھی پہلے ہی جاری کی جا چکی ہیں۔
وزارت اطلاعات کے مطابق پاکستان جھوٹے، پرانے یا مصنوعی ذہانت سے تیار کردہ تصاویر اور ویڈیوز پر انحصار نہیں کرتا۔ بیان میں کہا گیا کہ افغان طالبان حکومت کے سرکاری ذرائع ابلاغ کی جانب سے بار بار جھوٹے دعوے اور جعلی معلومات پھیلانے سے ان کی ساکھ نہ صرف ملکی بلکہ بین الاقوامی سطح پر بھی متاثر ہو رہی ہے۔حکومت پاکستان نے اپنے بیان کے اختتام پر کہا کہ “سچ ہمیشہ جھوٹ پر غالب آتا ہے۔”