اوکاڑہ (نامہ نگار ملک ظفر) یونین کونسل پیر بخش شرقی سے تعلق رکھنے والے آل پاکستان بھوہڑ ایسوسی ایشن کے معززین کے وفد نے پنجاب اسمبلی میں وزیر معدنیات پنجاب سردار شیر علی خان گورچانی سے ملاقات کی۔ ملاقات کے دوران علاقے کی مجموعی سیاسی صورتحال، عوامی مسائل اور جاری ترقیاتی منصوبوں پر تفصیلی گفتگو کی گئی۔
وفد کی قیادت ملک غلام شبیر بھوہڑ نے کی ۔وفد نے بالخصوص اڈا چراغ شاہ سے ریخ باغ والا تا شاہ والی پل تک گزشتہ 30 سالوں سے خستہ حال روڑ کی تعمیر کی منظوری پر وزیر معدنیات سردار شیر علی خان گورچانی کا شکریہ ادا کیا۔ اس موقع پر وفد کا کہنا تھا کہ اس سڑک کی تعمیر سے علاقے کے عوام کو آمدورفت کی بہتر سہولت میسر آئیں گیں اور مقامی معیشت کو بھی فروغ حاصل ہوگا۔
سردار شیر علی خان گورچانی نے وفد کو یقین دہانی کرائی کہ علاقائی ترقی ان کی اولین ترجیح ہے اور عوامی فلاح کے منصوبوں کو تیزی سے مکمل کیا جائے گا۔ انہوں نے بتایا کہ ان شاء اللہ وہ اس اہم سڑک کا باقاعدہ افتتاح کریں گے جس کے بعد تعمیراتی کام کا آغاز کر دیا جائے گا۔
ملاقات میں آل پاکستان بھوہڑ ایسوسی ایشن کے چیئرمین ملک غلام شبیر بھوہڑ ، ملک عمر فاروق بھوہڑ ،ملک حاجی عبد المجید بھوہڑ اور ملک حبیب اللہ بھوہڑ شریک تھے۔ وفد نے سردار شیر علی خان گورچانی کی عوامی خدمات کو سراہتے ہوئے ان پر بھرپور اعتماد کا اظہار کیا اور گورچانی گروپ کے ساتھ مکمل تعاون کی یقین دہانی کرائی۔
وفد نے کہا کہ علاقے کی ترقی اور عوامی خدمت کے لیے سردار شیر علی خان گورچانی کی قیادت قابل تحسین ہے اور عوام ان کے ترقیاتی ویژن کو قدر کی نگاہ سے دیکھتے ہیں۔ال پاکستان بھوہڑ ایسوسی ایشن کے چیئرمین ملک غلام شبیر بھوہڑ نے سردار شیر علی گورچانی کا شکریہ ادا کیا ۔ملک عمر فاروق بھوہڑ نے صوبائی وزیر معدنیات سردار شیر علی گورچانی کو پھولوں کا گلدستہ پیش کیا