معروف عالم دین علامہ شہنشاہ حسین نقوی نے عوام سے اپیل کی ہے کہ وہ شدت پسندی سے گریز کریں اور ہر حال میں پرامن رہیں۔ انہوں نے کہا کہ شہادت ایک سعادت ہے اور وہ رہبر معظم کی شہادت پر مبارکباد پیش کرتے ہیں۔ انہوں نے ایرانی قوم اور دنیا بھر کے مظلوموں پر زور دیا کہ وہ اپنی جدوجہد کو جاری رکھیں اور صبر کا دامن ہاتھ سے نہ چھوڑیں۔
کراچی میں ہونے والے پروگراموں کے حوالے سے علامہ نے بتایا کہ نمائش چورنگی پر مجلس عزا کا انعقاد ہوگا جہاں سے عزائی جلوس حسینیان ایرانیاں تک جائے گا۔ انہوں نے ماتمی انجمنوں، عزاداران، اسکاؤٹ گروپس اور تمام شرکاء سے پرزور اپیل کی کہ وہ نظم و ضبط قائم رکھیں اور پرامن طریقے سے اپنی عقیدت کا اظہار کریں۔
امریکی قونصل خانے کے باہر پیش آنے والے واقعے پر دکھ کا اظہار کرتے ہوئے علامہ شہنشاہ حسین نقوی نے کہا کہ یہ صورتحال افسوسناک ہے۔ انہوں نے پاکستان کی جانب سے سفارتی اور اخلاقی طور پر ایران کی حمایت اور اقوام متحدہ میں حملے کی مذمت کے اقدام کو سراہا۔ انہوں نے زور دیا کہ عوامی سطح پر بھی ذمہ داری کا مظاہرہ کیا جائے۔
علامہ شہنشاہ حسین نقوی کی عوام سے پرامن رہنے کی اپیل
