محض بیانات سے حالات بہتر نہیں ہوں گے بلکہ عملی اقدامات ناگزیر ہیں،فیصل کریم کنڈی

گورنر خیبرپختونخوا فیصل کریم کنڈی نے حکمرانوں پر زور دیا کہ وہ غیر ضروری سیاسی مصروفیات کے بجائے عوامی فلاح اور صوبے کے مسائل کے حل پر توجہ دیں، کیونکہ محض بیانات سے حالات بہتر نہیں ہوں گے بلکہ عملی اقدامات ناگزیر ہیں۔

گورنر خیبرپختونخوا فیصل کریم کنڈی نے میڈیا سے گفتگو کرتے ہوئےصوبے کی موجودہ سیاسی فضا پر تنقید کرتے ہوئے کہا ہے کہ عوامی مسائل کے حل کے بجائے غیر ضروری سیاسی سرگرمیوں اور نمائشی اقدامات کو ترجیح دی جا رہی ہے لگتا ہے کے پی اسمبلی کا اگلا اجلاس مویشی منڈی میں ہوگا،اسمبلی اجلاس پر ہونے والے اخراجات اگر جامعات کے ملازمین کی تنخواہوں پر صرف کیے جاتے تو زیادہ مفید ثابت ہوتے۔

انہوں نے کہاکہ آئینی اختیارات اپنی جگہ موجود ہیں، مگر حالیہ اجلاس کی نوعیت واضح نہیں کہ وہ حکومت کے خلاف تھا یا اسپیکر کے، کیونکہ بظاہر ایسا لگتا ہے جیسے یہ اجلاس اپنے ہی خلاف منعقد کیا گیا ہو،کھیلوں کے میدان نوجوانوں کی مثبت سرگرمیوں کے لیے ہوتے ہیں، لیکن انہیں سیاسی مقاصد کے لیے استعمال کرنا افسوسناک ہے۔

فیصل کریم کنڈی کے مطابق صوبے میں ایک سیاسی جماعت کے اندر اختلافات کھل کر سامنے آ چکے ہیں اور ایک دوسرے کو نیچا دکھانے کے لیے مختلف اقدامات کیے جا رہے ہیں، انہوں نے کرپشن کے بڑھتے رجحان پر بھی تشویش ظاہر کی اور الزام لگایا کہ کچھ عناصر تاحیات مراعات حاصل کرنے کی کوشش میں ہیں۔