پاکستان کے نامور اولمپک گولڈ میڈلسٹ اور جیولین تھرو کے عالمی چیمپئن ارشد ندیم کو ایک اور بین الاقوامی اعزاز حاصل ہو گیا ہے۔ انہیں دبئی میں منعقدہ 17ویں ورلڈ اسپورٹس سمٹ کے دوران دبئی کے حکمران کے نام سے منسوب باوقار شیخ محمد بن زاید ایوارڈ سے نوازا گیا۔
یہ اعزاز دبئی میں ہونے والی ورلڈ اسپورٹس سمٹ کے دوران اسپورٹس کی دنیا کی ممتاز اور نامور شخصیات کی موجودگی میں دیا گیا۔ تقریب میں مختلف ممالک سے تعلق رکھنے والے اسپورٹس لیجنڈز، منتظمین اور عالمی اداروں کے نمائندے شریک تھے، جہاں ارشد ندیم کی شاندار کارکردگی اور عالمی سطح پر پاکستان کا نام روشن کرنے پر انہیں خراجِ تحسین پیش کیا گیا۔دبئی کے حکمران کے صاحبزادے شیخ منصور بن محمد بن راشد المختوم نے خود اولمپک گولڈ میڈلسٹ ارشد ندیم کو یہ اعزاز پیش کیا۔ اس موقع پر ارشد ندیم کی محنت، عزم اور کھیل کے میدان میں غیر معمولی کامیابیوں کو سراہا گیا۔
واضح رہے کہ ارشد ندیم نے 2024 کے پیرس اولمپکس میں تاریخ ساز کارکردگی کا مظاہرہ کرتے ہوئے 92 اعشاریہ 97 میٹر کی شاندار تھرو کے ساتھ جیولین تھرو کے مقابلے میں گولڈ میڈل جیتا تھا۔ یہ کامیابی نہ صرف پاکستان بلکہ پورے خطے کے لیے باعثِ فخر بنی اور ارشد ندیم نے عالمی سطح پر اپنی صلاحیتوں کا لوہا منوایا۔شیخ محمد بن زاید ایوارڈ کا حصول اس بات کا ثبوت ہے کہ ارشد ندیم کی کامیابیاں صرف اولمپکس تک محدود نہیں بلکہ انہیں عالمی اسپورٹس کمیونٹی میں بھی غیر معمولی مقام حاصل ہو چکا ہے۔ یہ اعزاز پاکستانی اسپورٹس کے لیے ایک اہم سنگِ میل قرار دیا جا رہا ہے۔