ایران کے سابق سپریم لیڈر آیت اللہ علی خامنہ ای کی شہادت سے چند لمحے قبل لی گئی ایک اہم اور جذباتی تصویر ایرانی میڈیا کی جانب سے جاری کر دی گئی ہے، جس نے دنیا بھر میں توجہ حاصل کر لی ہے۔
ایرانی ذرائع ابلاغ کے مطابق یہ تصویر ایک سی سی ٹی وی کیمرے سے حاصل کی گئی، جس میں آیت اللہ خامنہ ای کو نہایت سکون کے ساتھ قرآن پاک کی تلاوت کرتے ہوئے دیکھا جا سکتا ہے۔ تصویر کے منظر عام پر آنے کے بعد سوشل میڈیا پر اسے بڑے پیمانے پر شیئر کیا جا رہا ہے اور صارفین کی جانب سے مختلف جذباتی ردعمل سامنے آ رہے ہیں۔رپورٹس کے مطابق آیت اللہ خامنہ ای 28 فروری کو ہونے والے مبینہ امریکی اور اسرائیلی حملوں کے نتیجے میں شہید ہوئے تھے۔
ایرانی میڈیا کا کہنا ہے کہ آخری لمحات میں بھی آیت اللہ خامنہ ای عبادت میں مصروف تھے، جسے ان کے پیروکار ایک روحانی اور قابلِ احترام پہلو کے طور پر دیکھ رہے ہیں۔ تجزیہ کاروں کے مطابق اس تصویر کے اجرا کا مقصد عوامی جذبات کو ابھارنا اور داخلی یکجہتی کو فروغ دینا بھی ہو سکتا ہے۔