گوجرخان (قمرشہزاد) تھانہ گوجرخان کی حدود میں محنت کش کے 13 سالہ نواسے سے بدفعلی کی کوشش کا شرمناک واقعہ سامنے آیا ہے۔ پولیس نے متاثرہ لڑکے کے نانا کی مدعیت میں ملزم کے خلاف مقدمہ درج کر کے قانونی کارروائی شروع کر دی ہے۔
تفصیلات کے مطابق بڑا موہڑہ کنگر کے رہائشی مختیار حسین نے پولیس کو دی گئی درخواست میں موقف اختیار کیا کہ ان کا 13 سالہ نواسہ ع گزشتہ شام دودھ لینے کے لیے پڑوسی طارق محمود کے گھر گیا تھا۔ ملزم گھر میں اکیلا تھا، جس نے بچے کو دیکھتے ہی اسے ہراساں کرنا شروع کر دیا، نازیبا حرکات کیں اور زبردستی شلوار اتار کر بدفعلی کی کوشش کی۔ درخواست گزار کے مطابق، جب بچہ کافی دیر تک گھر نہ پہنچا تو وہ خود اسے لینے گئے، جہاں انہوں نے بچے کو ملزم کے گھر سے شور و واویلا کرتے ہوئے نکلتے دیکھا۔ بچے نے اپنے ساتھ پیش آنے والے واقعے کی تفصیلات گھر والوں کو بتائیں، جس کے بعد پولیس سے رجوع کیا گیا۔ تھانہ گوجرخان کی پولیس نے واقعے کی سنگینی کو مدنظر رکھتے ہوئے فوری طور پر ایف آئی آر درج کر لی ہے۔ پولیس حکام کا کہنا ہے کہ تفتیش جاری ہے اور متاثرہ خاندان کو انصاف فراہم کیا جائے گا۔