بنوں حملے کے تانے بانے افغانستان میں موجود خارجی حافظ گل بہادر سے جاملے

بنوں خودکش حملے کے تانے بانے افغانستان میں موجود خارجی حافظ گل بہادر سے جاملے، فتنہ الخوارج اتحاد المجاہدین نے ذمہ داری قبول کرلی۔

سیکیورٹی ذرائع کے مطابق اتحاد المجاہدین کا تعلق فتنہ الخوارج کے حافظ گل بہادر گروپ سے ہے، اتحاد المجاہدین کا مرکزی سرغنہ گل بہادر افغانستان میں پناہ لیے ہوئے ہے، حافظ گل بہادر گروپ پاکستان میں دہشتگردی اور فتنہ انگیزی میں ملوث ہے۔ذرائع کے مطابق میر علی سمیت شمالی اور جنوبی وزیرستان میں متعدد حملوں کی ذمہ داری اسی گروپ نے قبول کی، حملوں کی منصوبہ بندی اور سہولت کاری بھی افغانستان سے کی گئی۔حافظ گل بہادر سمیت فتنہ الخوارج کے مرکزی سرغنوں کی افغانستان میں موجودگی ثبوت ہے کہ افغان سرزمین دہشتگردی کیلئے استعمال ہو رہی ہے، افغان طالبان رجیم کی جانب سے دہشت گرد تنظیموں کی پشت پناہی سے واضح ہے کہ دہشتگردوں کو افغانستان میں محفوظ پناہ گاہیں میسر ہیں، شواہد سے یہ بات بھی ثابت ہوئی ہے کہ پاکستان میں دہشت گردی کے واقعات میں 70 فیصد سے زائد عناصر افغان نژاد یا افغانستان سے مربوط نیٹ ورکس سے تعلق رکھتے ہیں،

واضح رہے کہ بنوں حملے میں لیفٹیننٹ کرنل شہزادہ گل فراز اور سپاہی کرامت شاہ شہید ہوئے جبکہ فائرنگ کے تبادلے میں 5 خوارج بھی مارے گئے۔