بنوں: ضلع بنوں کے مختلف علاقوں اکبر علی خان کلے، اسپرکہ اور ڈومیل میں پولیس اور سیکیورٹی فورسز کی جانب سے عسکریت پسندوں کے خلاف آج علی الصبح مشترکہ آپریشن شروع کیا گیا، جو تاحال جاری ہے۔
سیکیورٹی ذرائع کے مطابق آپریشن خفیہ اطلاعات کی بنیاد پر کیا گیا، جس کا مقصد علاقے میں موجود شدت پسند عناصر کا قلع قمع کرنا تھا۔آپریشن کے دوران فورسز اور عسکریت پسندوں کے درمیان شدید فائرنگ کا تبادلہ ہوا، جس کے نتیجے میں اب تک تین عسکریت پسند ہلاک ہو چکے ہیں، جبکہ متعدد کے زخمی ہونے کی اطلاعات بھی موصول ہوئی ہیں۔ ذرائع کا کہنا ہے کہ بعض زخمی عسکریت پسند فرار ہونے میں کامیاب ہو گئے، جن کی گرفتاری کے لیے علاقے میں سرچ آپریشن مزید تیز کر دیا گیا ہے۔
ڈی آئی جی بنوں ریجن سجاد خان، ڈی پی او بنوں یاسر آفریدی اور 116 بریگیڈ کے بریگیڈیئر عمیر نیازی آپریشن کے دوران خود فیلڈ میں موجود رہے اور تمام کارروائی کی براہ راست نگرانی کرتے رہے۔ اعلیٰ حکام کی موجودگی میں فورسز نے مختلف مقامات پر گھیراؤ کرتے ہوئے مشتبہ ٹھکانوں کی تلاشی لی۔سیکیورٹی حکام کے مطابق آپریشن کے دوران شہری آبادی کو محفوظ رکھنے کے لیے خصوصی اقدامات کیے گئے ہیں، جبکہ حساس علاقوں میں اضافی نفری تعینات کر دی گئی ہے۔ علاقے کے داخلی و خارجی راستوں پر ناکہ بندی بھی کی گئی ہے تاکہ کسی بھی مشتبہ شخص کی نقل و حرکت کو روکا جا سکے۔