سابق وزیراعظم اور پاکستان پیپلزپارٹی کی قائد محترمہ بینظیر بھٹو شہید کی برسی کے موقع پر شرکت کے لیے اعلیٰ سطح کا حکومتی وفد سکھر پہنچ گیا ہے۔ وزیراعظم محمد شہباز شریف کی خصوصی ہدایت پر یہ وفد برسی کی مرکزی تقریب میں شرکت کرے گا اور شہید رہنما کو خراجِ عقیدت پیش کرے گا۔
حکومتی وفد کی قیادت اسپیکر قومی اسمبلی سردار ایاز صادق کر رہے ہیں، جبکہ وفد میں وزیراعظم کے مشیر رانا ثناء اللہ، وفاقی وزیر طارق فضل چوہدری اور متعدد اراکین قومی اسمبلی شامل ہیں۔ وفد اپنے دورے کے دوران پاکستان پیپلزپارٹی کی مرکزی قیادت سے ملاقاتیں بھی کرے گا، جن میں ملکی سیاسی صورتحال، جمہوری استحکام اور قومی امور پر تبادلہ خیال متوقع ہے۔برسی کی تقریب کے موقع پر اسپیکر قومی اسمبلی سردار ایاز صادق نے اپنے پیغام میں کہا کہ آج ہم پاکستان کی عظیم بیٹی، پہلی خاتون وزیراعظم اور جمہوریت کی علمبردار محترمہ بینظیر بھٹو شہید کی برسی منا رہے ہیں۔ انہوں نے کہا کہ بینظیر بھٹو نے نہ صرف پاکستان بلکہ پوری دنیا میں خواتین کے کردار کو مضبوط بنانے میں کلیدی کردار ادا کیا اور سیاست میں خواتین کی نمائندگی کو ایک نئی جہت دی۔
سردار ایاز صادق کا کہنا تھا کہ بینظیر بھٹو شہید نے پاکستان میں رواداری، برداشت، قانون کی حکمرانی اور عوامی فلاح کے اصولوں کو فروغ دیا۔ انہوں نے جمہوری اقدار کے لیے اپنی جان کا نذرانہ پیش کیا اور ہمیشہ عوامی حقوق، سماجی انصاف اور آئین کی بالادستی کے لیے جدوجہد کی۔ برسی کی تقریبات کے دوران قرآن خوانی، فاتحہ خوانی اور مختلف سیاسی و سماجی شخصیات کی جانب سے شہید رہنما کو خراجِ عقیدت بھی پیش کیا جا رہا ہے۔