بینظیر کی برسی،صدر مملکت آصف زرداری،بلاول نوڈیرو ہاؤس پہنچ گئے

بینظیر بھٹو شہید کی 18ویں برسی کی تقریب میں شرکت کیلئے صدر مملکت آصف علی زرداری اور چیئرمین پیپلز پارٹی بلاول بھٹو زرداری نوڈیرو ہاؤس پہنچ چکے ہیں، جیالے رہنماء آج جلسہ عام سے خطاب کریں گے۔گزشتہ روز آصفہ بھٹو زرداری نے اپنی والدہ کی قبر پر فاتحہ خوانی کی۔

اسپیکر قومی اسمبلی سردار ایاز صادق کی قیادت میں وفد گڑھی خدا بخش روانہ ہو گیا،وفد میں مشیر وزیر اعظم رانا ثناء اللہ وفاقی وزیر طارق فضل چوہدری اور اراکین قومی اسمبلی شامل ہیں،یہ وفد وزیر اعظم شہبازشریف کی خصوصی ہدایت پر برسی کی تقریب میں شرکت کرے گا

صدر مملکت نے بینظیر بھٹو کی برسی پر پیغام میں کہا کہ شہید ہمیں یاد دلاتی رہیں کہ جمہوریت بہترین انتقام ہے، ماضی میں جمہوریت کو بار بار قدغنوں کا سامنا رہا۔ان کا کہنا ہے کہ خواتین کیلئے راستے مشکل تر بنائے گئے، لیکن بینظیر بھٹو نے آئین، پارلیمان اور عوام کے حقوق کیلئے بھرپور جدوجہد کی، انہوں نے تشدد اور نفرت کیخلاف کھل کر بات کی۔بلاول بھٹو زرداری نے اپنے پیغام میں کہا کہ بی بی شہید کی عظیم قربانی خون سے لکھا عہد ہے کہ پاکستان میں جمہوریت کبھی سرینڈر نہیں کرے گی، 27 دسمبر ہمارا اجتماعی سوگ، غور و فکر اور عزم کی تجدید کا دن ہے۔

مسلم دنیا کی پہلی خاتون وزیراعظم بے نظیر بھٹو کی شہادت کو 18 برس بیت گئے، گڑھی خدا بخش میں پیپلزپارٹی آج جلسہ کرے گی۔

بے نظیر بھٹو جمہوریت کی علامت، عوام کی توانا آواز اور چاروں صوبوں کی زنجیر سمجھی جاتی تھیں، ان کی سیکیورٹی اور سانحہ لیاقت باغ سے جڑے کئی سوالات کے جواب تاحال نہیں مل سکے۔بی بی کی واپسی پر سیکیورٹی کی عدم موجودگی پر سوال اب بھی برقرار ہیں، ی بی کو واپسی پر کلیئر روٹ کیوں نہ دیا گیا؟، گاڑی کے ٹائر برسٹ ہونے کے بعد دوسری گاڑی کیوں نہ ملی؟، جائے حادثہ دھونے میں جلد بازی کا مظاہرہ کیوں کیا گیا؟۔ یہ وہ سوالات ہیں جو آج بھی لوگوں کے ذہنوں میں موجود ہیں۔بے نظیر بھٹو 2 بار پاکستان کی وزیراعظم رہیں تاہم ان کی دونوں حکومتیں اپنی مدت پوری نہیں کرسکی تھیں۔