بھارتی احمد آباد میں پیش آنے والے ایک ہولناک واقعے نے انسانیت کو شرمندہ کر دیا، جہاں بیوی کی جانب سے جسمانی تعلقات سے انکار پر شوہر نے اپنی ہی سوتیلی بیٹی کو نشانہ بنا ڈالا۔ واقعے کے بعد پولیس نے فوری کارروائی کرتے ہوئے ملزم کو گرفتار کر لیا۔
پولیس کے مطابق یہ افسوسناک واقعہ کرشن نگر کے علاقے میں پیش آیا، جہاں چھ سالہ بچی اپنے والدین اور ایک چھوٹے بھائی کے ساتھ رہائش پذیر تھی۔ واقعے کے وقت بچی کی ماں بیڈروم سے متصل گیلری میں کپڑے خشک کرنے گئی ہوئی تھی۔اسی دوران ملزم نے موقع کا فائدہ اٹھاتے ہوئے معصوم بچی کے ساتھ زیادتی کی کوشش کی۔ بچی کی چیخ و پکار سن کر ماں فوراً کمرے میں پہنچی اور شوہر کو قابل اعتراض حالت میں دیکھ کر بچی کو اس کے چنگل سے چھڑایا۔پولیس حکام کا کہنا ہے کہ ملزم نے اس سے قبل اپنی بیوی سے جسمانی تعلقات کا مطالبہ کیا تھا، لیکن طبیعت ناساز ہونے کی وجہ سے بیوی نے انکار کر دیا۔ اس پر ملزم مشتعل ہو گیا اور اس نے یہ سنگین جرم کر ڈالا۔
متاثرہ بچی کی ماں کی پہلی شادی 2019 میں ہوئی تھی جس سے ایک بیٹی پیدا ہوئی، جبکہ 2020 میں طلاق کے بعد خاتون نے 2021 میں ملزم سے دوسری شادی کی، جس سے ایک بیٹا بھی ہے۔واقعے کے فوراً بعد پولیس کو اطلاع دی گئی، جس پر اہلکار موقع پر پہنچے اور ملزم کو گرفتار کر لیا۔ پولیس نے ملزم کے خلاف بھارتی تعزیراتِ ہند اور پاکسو ایکٹ کے تحت مقدمہ درج کر لیا ہے۔