برٹش ایئرویز کے ایک مسافر بردار طیارے کو پیر کے روز اس وقت ایک غیر معمولی صورتحال کا سامنا کرنا پڑا جب ٹیک آف کے دوران اس کا ایک پہیہ نیچے جا گرا۔ واقعے کے باوجود طیارے نے پرواز جاری رکھی اور بحرِ اوقیانوس عبور کرنے کے بعد بحفاظت لندن پہنچ گیا۔
تفصیلات کے مطابق برٹش ایئرویز کی پرواز، جو جدید ایئر بس A350-1000 طیارے کے ذریعے آپریٹ کی جا رہی تھی، پیر کی شب امریکی ریاست نیوایڈا کے ہیری ریڈ انٹرنیشنل ایئرپورٹ سے لندن کے لیے روانہ ہوئی۔ طیارے نے رات 9 بجکر 10 منٹ پر اڑان بھری، تاہم ٹیک آف کے فوری بعد طیارے کا پچھلا پہیہ نیچے جا گرا۔ذرائع کے مطابق پہیہ گرنے کے واقعے کے باوجود طیارے کے عملے نے صورتحال کا بغور جائزہ لیا اور تمام حفاظتی پروٹوکولز پر عمل کرتے ہوئے پرواز کو جاری رکھنے کا فیصلہ کیا۔ طیارہ بحرِ اوقیانوس کے اوپر سے پرواز کرتا ہوا مقررہ وقت سے 27 منٹ قبل لندن کے ایئرپورٹ پر بحفاظت لینڈ کر گیا، جہاں ایوی ایشن حکام اور انجینئرنگ ٹیمیں پہلے سے موجود تھیں۔
ایئرلائن حکام کا کہنا ہے کہ طیارے میں سوار تمام مسافر اور عملے کے ارکان محفوظ رہے اور کسی قسم کے جانی نقصان یا زخمی ہونے کی اطلاع نہیں ملی۔ لینڈنگ کے بعد طیارے کا تکنیکی معائنہ کیا گیا جبکہ ایئرپورٹ پر سیکیورٹی اور ایمرجنسی سروسز بھی الرٹ رہیں۔برٹش ایئرویز کے ترجمان نے واقعے کی تصدیق کرتے ہوئے کہا ہے کہ مسافروں کی حفاظت اور سلامتی ایئرلائن کی اولین ترجیح ہے۔ ان کے مطابق طیارے کا پہیہ گرنے کی وجہ فی الحال معلوم نہیں ہو سکی، تاہم واقعے کی مکمل تحقیقات شروع کر دی گئی ہیں تاکہ اصل وجوہات کا تعین کیا جا سکے۔