ڈیرہ غازی خان (باغی ٹی وی سٹی رپورٹر) وزیر اعلیٰ پنجاب مریم نواز شریف کی خصوصی ہدایت پر ڈپٹی کمشنر ڈیرہ غازی خان محمد عثمان خالد اور چیف آفیسر جواد الحسن گوندل نے تحصیل کوٹ چھٹہ کا تفصیلی دورہ کیا۔ دورے کے دوران ستھرا پنجاب پروگرام کے تحت جاری صفائی و ستھرائی کے انتظامات کا عملی جائزہ لیا گیا۔
ڈپٹی کمشنر نے مختلف علاقوں میں صفائی کی صورتحال کا معائنہ کیا اور موقع پر موجود شہریوں سے براہِ راست گفتگو کرتے ہوئے صفائی سے متعلق آراء حاصل کیں۔ شہریوں نے مجموعی طور پر صفائی کے انتظامات پر اطمینان کا اظہار کیا اور ضلعی انتظامیہ کی جانب سے ویسٹ مینجمنٹ کے اقدامات کو سراہا۔
اس موقع پر محمد عثمان خالد نے متعلقہ افسران کو ہدایت کی کہ صفائی کے معیار کو مزید بہتر بنایا جائے اور عوامی شکایات کا فوری ازالہ یقینی بنایا جائے۔ انہوں نے کہا کہ حکومت پنجاب عوام کو صاف، صحت مند اور خوشگوار ماحول فراہم کرنے کے لیے سنجیدہ اور عملی اقدامات کر رہی ہے، جبکہ ستھرا پنجاب پروگرام اس عزم کی عملی مثال ہے۔