دہشتگردی کی کوشش ناکام بنانے پر سیکورٹی فورسز کو سراہتے ہیں،شرجیل میمن

سندھ کے سینئر صوبائی وزیر اور صوبائی وزیر اطلاعات شرجیل انعام میمن نے کراچی کو ایک بڑی دہشت گردی کی کارروائی سے بچانے پر سیکیورٹی فورسز اور قانون نافذ کرنے والے اداروں کی بروقت اور مؤثر کارروائی کو سراہا ہے۔

شرجیل میمن کا کہنا تھا کہ سیکیورٹی اداروں کی پیشہ ورانہ صلاحیت، مستعدی اور فوری ردعمل کے باعث ایک خطرناک دہشت گرد منصوبہ ناکام بنا دیا گیا، جس کے نتیجے میں شہر ایک ممکنہ بڑے سانحے سے محفوظ رہا۔شرجیل انعام میمن کا کہنا تھا کہ سیکیورٹی فورسز کی بروقت کارروائی نے نہ صرف قیمتی انسانی جانوں کو بچایا بلکہ کراچی جیسے اہم معاشی و تجارتی مرکز کو بھی بڑے نقصان سے محفوظ رکھا۔ انہوں نے واضح کیا کہ پاکستان دشمن عناصر اور ہمسایہ ممالک کی جانب سے کی جانے والی ایسی بزدلانہ کوششیں کبھی کامیاب نہیں ہوں گی۔

سینئر صوبائی وزیر نے کہا کہ پاکستان اس وقت معاشی استحکام اور بہتری کی جانب گامزن ہے، جسے سبوتاژ کرنے کے لیے دشمن عناصر دہشت گردی جیسے ہتھکنڈے استعمال کر رہے ہیں، تاہم قوم اور سیکیورٹی ادارے متحد ہو کر ان سازشوں کو ناکام بنا رہے ہیں۔ انہوں نے کہا کہ کراچی ملک کی معاشی شہ رگ ہے اور اس کے امن و امان کو ہر قیمت پر یقینی بنایا جائے گا۔صوبائی حکومت، سیکیورٹی اداروں کے ساتھ مل کر دہشت گردی کے مکمل خاتمے اور شہریوں کے تحفظ کے لیے ہر ممکن اقدامات جاری رکھے گی۔