بھارتی دارالحکومت نئی دہلی میں پیر کی صبح متعدد اسکولوں کو بم کی دھمکیاں موصول ہوئیں، جس کے بعد شہر بھر میں خوف و ہراس پھیل گیا اور سیکیورٹی اداروں کو ہائی الرٹ کر دیا گیا۔
دہلی فائر سروس (ڈی ایف ایس) کے مطابق پہلی کال صبح 8 بج کر 33 منٹ پر موصول ہوئی، جس کے فوراً بعد فائر بریگیڈ کی گاڑیاں، بم ڈسپوزل اسکواڈ اور پولیس ٹیمیں متاثرہ مقامات پر روانہ کر دی گئیں۔ابتدائی اطلاعات کے مطابق شہر کے مختلف علاقوں میں واقع 9 اسکولوں کو ای میل کے ذریعے بم دھماکوں کی دھمکیاں دی گئیں۔ دھمکی موصول ہونے والے اسکولوں میں،لوریٹو کانوینٹ اسکول، دہلی کینٹ،کیمبرج اسکول، سری نیواسپوری (جنوبی دہلی)،وینکٹیشور اسکول، روہنی (نارتھ ویسٹ دہلی)،سی ایم اسکول، روہنی،بال بھارتی اسکول، روہنی،کیمبرج اسکول، نیو فرینڈز کالونی (جنوبی دہلی)،دی انڈین اسکول، صادق نگر (جنوبی دہلی)،ڈی ٹی اے اسکول، آئی این اے شامل ہیں،حکام کے مطابق مزید اسکولوں کو بھی اسی نوعیت کی دھمکیاں موصول ہونے کی اطلاعات سامنے آ رہی ہیں، جن کی تصدیق کا عمل جاری ہے۔
ذرائع کے مطابق دھمکی آمیز ای میل میں انتہائی اشتعال انگیز اور خوفناک زبان استعمال کی گئی۔ ای میل میں دعویٰ کیا گیا کہ “دہلی خالصتان بنے گا، پنجاب خالصتان ہے، افضل گرو کی یاد میں”۔ ای میل میں یہ بھی کہا گیا کہ 13 فروری کو دوپہر 1 بج کر 11 منٹ پر پارلیمنٹ میں دھماکہ ہوگا۔
سیکیورٹی اداروں نے فوری طور پر تمام متاثرہ اسکولوں کو خالی کروا کر تلاشی اور سرچ آپریشن شروع کر دیا ہے، جبکہ طلبہ اور عملے کی حفاظت کے لیے سخت انتظامات کیے گئے ہیں۔ پولیس کا کہنا ہے کہ اب تک کسی مشتبہ شے کی برآمدگی کی اطلاع نہیں ملی، تاہم ہر پہلو سے تحقیقات جاری ہیں۔حکام کے مطابق ای میل بھیجنے والے عناصر کا سراغ لگانے کے لیے سائبر سیل کو بھی متحرک کر دیا گیا ہے، جبکہ صورتحال پر قریبی نظر رکھی جا رہی ہے۔ مزید تفصیلات کا انتظار ہے۔