گھوٹکی (باغی ٹی وی، نامہ نگار مشتاق علی لغاری) ڈی آئی جی سکھر رینج ناصر آفتاب نے رونتی کچہ اور ماچکہ کچہ کے انتہائی حساس علاقوں کا ہنگامی اور تفصیلی دورہ کیا۔ دورے کے دوران جدید ڈرون ٹیکنالوجی کے ذریعے کچہ کے دشوار گزار اور مشکوک مقامات کا فضائی معائنہ کیا گیا تاکہ جرائم پیشہ عناصر کی نقل و حرکت اور ممکنہ ٹھکانوں پر کڑی نظر رکھی جا سکے۔
ڈی آئی جی ناصر آفتاب نے موقع پر موجود پولیس افسران کو ہدایت کی کہ کچہ کے علاقوں میں ڈاکوؤں اور جرائم پیشہ گروہوں کے خلاف انٹیلیجنس بیسڈ کارروائیاں مزید تیز کی جائیں اور جدید ٹیکنالوجی کا مؤثر استعمال یقینی بنایا جائے۔
انہوں نے کہا کہ کچہ کے علاقوں میں امن و امان کی بحالی، اغواء برائے تاوان، ڈکیتی اور دیگر سنگین جرائم کا خاتمہ پولیس کی اولین ترجیح ہے اور اس مقصد کے لیے کسی قسم کی کوتاہی برداشت نہیں کی جائے گی۔
ڈی آئی جی سکھر نے جوانوں کے حوصلے اور کارکردگی کو سراہتے ہوئے کہا کہ سکھر رینج پولیس عوام کے جان و مال کے تحفظ کے لیے ہر ممکن اقدامات جاری رکھے گی اور جرائم کے مکمل خاتمے تک کارروائیاں جاری رہیں گی۔