اوکاڑہ (باغی ٹی وی/نامہ نگار ملک ظفر) آر پی او ساہیوال محمد ایاز سلیم کی کھلی کچہری کے مثبت ثمرات سامنے آ گئے، جہاں پولیس نے قلیل وقت میں مؤثر کارروائی کرتے ہوئے مسروقہ مال برآمد کر کے شہریوں کا اعتماد بحال کر دیا۔ اس سلسلے میں ڈی پی او آفس اوکاڑہ میں تقریبِ تقسیمِ مالِ مسروقہ کا انعقاد کیا گیا، جس میں برآمد شدہ مال اصل مالکان کے حوالے کیا گیا۔
پولیس حکام کے مطابق بروقت اور مؤثر تفتیش کے نتیجے میں ساڑھے چھ لاکھ روپے سے زائد مالیت کا مسروقہ مال برآمد کیا گیا، جس میں 5 موٹر سائیکلیں اور 50 ہزار روپے نقد شامل ہیں۔ یہ کامیاب ریکوریاں تھانہ حویلی لکھا کے دائرہ اختیار میں کی گئیں، جو آر پی او ساہیوال محمد ایاز سلیم کی جانب سے منعقدہ کھلی کچہری میں شہریوں کی جانب سے دی گئی درخواستوں پر فوری عمل درآمد کا نتیجہ ہیں۔
تقریب کے دوران مسروقہ مال وصول کرنے والے شہریوں نے پولیس کی فوری داد رسی، شفاف تفتیش اور مؤثر کارکردگی کو سراہتے ہوئے اظہارِ تشکر کیا اور کہا کہ کھلی کچہری جیسے اقدامات سے عوام اور پولیس کے درمیان اعتماد کی فضا مضبوط ہو رہی ہے۔
پولیس حکام کا کہنا تھا کہ شہریوں کے جان و مال کا تحفظ، فوری اور منصفانہ انصاف کی فراہمی اور عوامی اعتماد کا فروغ پولیس کی اولین ترجیحات میں شامل ہے۔ ان کا مزید کہنا تھا کہ کھلی کچہریوں کے ذریعے عوامی شکایات کے فوری ازالے اور جرائم کی روک تھام کے لیے اقدامات کا سلسلہ آئندہ بھی جاری رکھا جائے گا۔