تھانہ ڈیفنس اے میں گھریلو ملازمہ اور اس کے بھائی پر مبینہ پولیس تشدد کا افسوسناک واقعہ سامنے آیا ہے، جس کی ویڈیوز سوشل میڈیا پر وائرل ہونے کے بعد اعلیٰ حکام نے فوری کارروائی کی ہے۔
تفصیلات کے مطابق 18 سالہ گھریلو ملازمہ پر ایک گھر سے انگوٹھی چوری کرنے کا الزام لگایا گیا، جس پر پولیس نے بغیر ٹھوس شواہد کے اسے اور اس کے بھائی کو حراست میں لے لیا۔ متاثرین کے مطابق دورانِ حراست انہیں شدید تشدد کا نشانہ بنایا گیا، جس کی ویڈیوز سامنے آنے پر معاملہ سنگین ہو گیا۔
ڈی آئی جی آپریشنز فیصل کامران نے واقعے کا نوٹس لیتے ہوئے سخت ایکشن لیا اور ایس ایچ او ڈیفنس اے سمیت تھانے کے تمام عملے کو معطل کر کے کلوز لائن کر دیا۔ اس کے ساتھ متعلقہ ایس ڈی پی او کو شوکاز نوٹس بھی جاری کیا گیا ہے۔
پولیس حکام کے مطابق تشدد میں ملوث دو اہلکاروں، کانسٹیبل حفصہ اور کانسٹیبل ساجد کے خلاف مقدمہ درج کر کے انہیں گرفتار کر لیا گیا ہے، جبکہ مزید تحقیقات جاری ہیں۔ واقعے کی انکوائری ایس پی کینٹ کے سپرد کی گئی ہے اور 24 گھنٹوں میں رپورٹ طلب کر لی گئی ہے۔
ڈی آئی جی آپریشنز نے واضح کیا کہ پولیس حراست میں کسی بھی قسم کا تشدد یا اختیارات کا ناجائز استعمال ہرگز برداشت نہیں کیا جائے گا۔ انہوں نے کہا کہ شہریوں کے ساتھ قانون اور احترام کے مطابق سلوک یقینی بنایا جائے گا اور خلاف ورزی کرنے والوں کے خلاف سخت کارروائی ہوگی۔
دوسری جانب متاثرہ خاندان نے اعلیٰ حکام سے انصاف کی فراہمی اور ذمہ دار اہلکاروں کو قرار واقعی سزا دینے کا مطالبہ کیا ہے۔
لاہور میں گھریلو ملازمہ پر مبینہ تشدد، پولیس اہلکار معطل
