وفاقی دارالحکومت اسلام آباد اور جڑواں شہر راولپنڈی میں پابندی کے باوجود دھماکا خیز فلئیر گیس کی غیر قانونی فروخت جاری ہے۔ ذرائع کے مطابق پٹرولیم ڈویژن کے ایکسپلوسو ڈیپارٹمنٹ کی واضح ہدایات کے باوجود 28 سی این جی اسٹیشنز پر یہ گیس غیر قانونی طور پر بیچی جا رہی ہے۔
اوگرا کے قوانین کے مطابق فلئیر گیس صرف بھٹوں اور صنعتی اداروں کو فراہم کی جا سکتی ہے، کیونکہ یہ انتہائی دھماکا خیز ہے اور کسی بھی وقت بڑا حادثہ رونما ہو سکتا ہے۔ ملک کے دیگر شہروں میں بھی تقریباً 1200 اسٹیشنز پر فلئیر گیس کی غیر قانونی فروخت کی جا رہی ہے۔
ماہرین کے مطابق فلئیر گیس کے غیر قانونی استعمال سے نہ صرف خطرناک دھماکے کا خدشہ ہوتا ہے بلکہ یہ گاڑیوں کے انجن اور ماحول کے لیے بھی نقصان دہ ہے۔ ڈائریکٹر ایکسپلوسو کے مطابق متعدد اسٹیشنز کے لائسنس کینسل کر دیے گئے تھے، تاہم عدالت سے حاصل کردہ سٹے آرڈرز کے تحت وہ اب بھی کام کر رہے ہیں۔
اسلام آباد اور راولپنڈی میں دھماکا خیز فلئیر گیس کی غیر قانونی فروخت کا انکشاف
