سانحہ گل پلازہ پر ایم کیو ایم پاکستان نے قومی اسمبلی میں احتجاج کیا۔ ڈاکٹر فاروق ستار نے واقعے کو قومی سانحہ قرار دینے کا مطالبہ کردیا۔
ڈاکٹر فاروق ستار نے قومی اسمبلی میں اپنے خطاب میں وزیراعلیٰ سندھ مراد علی شاہ اور میئر کراچی مرتضیٰ وہاب پر شدید تنقید کی اور کہا کہ ماضی کی غلطیوں کا ذکر کرکے ذمہ داری سے راہ فرار اختیار نہیں کی جاسکتی۔ان کا کہنا تھا کہ بے شمار جانوں اور اربوں روپے کا نقصان ہوا، کسی نہ کسی کو ذمہ داری لینی پڑے گی۔
ایم کیو ایم پاکستان کے رہنماء امین الحق کا کہنا ہے کہ کراچی کے گل پلازہ میں جو کچھ ہوا اس کا جواب کون دیگا؟، رات 10 بجے آگ لگتی ہے لیکن فائر ٹینڈر 40 منٹ بعد پہنچے، کیا گل پلازہ گلی میں تھا جو تاخیر ہوئی؟۔انہوں نے کہا کہ رات گزر گئی، لوگ جلتے رہے، کوئی نہیں آیا، ذمہ داری کے ایم سی اور صوبائی حکومت کی بنتی تھی، سانحہ گل پلازہ پر جوڈیشل کمیشن بنایا جائے۔امین الحق کا کہنا ہے کہ کراچی سندھ کو 98 فیصد کما کر دیتا ہے، پہلے دن سے کہہ رہے ہیں، ترمیم کرکے میئر کو بااختیار بنائیں، بلدیاتی نظام میں ترامیم پر اب کسی کو اعتراض نہیں ہونا چاہئے۔
دوسری جانب کراچی گل پلازہ میں آتشزدگی کے بعد ریسکیو آپریشن جاری ہے، ملبے سے ایک اور لاش نکال لی گئی، اموات کی تعداد 27 ہوگئی۔رپورٹ کے مطابق ریسکیو ٹیمیں ملبہ ہٹا کر اندر داخلے کیلئے راستہ بنانے میں مصروف ہیں، چھت سے متعدد گاڑیاں اور موٹر سائیکلیں محفوظ طریقے سے نکال لی گئیں۔ترجمان بلدیہ عظمیٰ کراچی کا کہنا ہے کہ چند گھنٹوں کے اندر ریسکیو عملہ پچھلی جانب سے عمارت کے اندر داخل ہونے کی پوزیشن میں ہوگا۔