فیڈرل بورڈ آف ریونیو (ایف بی آر) نے شوگر ملوں میں تعینات مانیٹرنگ اسٹاف کی غفلت کا سخت نوٹس لیتے ہوئے ڈیوٹی سے غیر حاضر رہنے والے 6 اہلکاروں کو فوری طور پر معطل کر دیا ہے۔ یہ اہلکار شوگر کی پیداوار کی مؤثر، شفاف اور بلا تعطل نگرانی کو یقینی بنانے کے لیے تعینات کیے گئے تھے۔
ذرائع کے مطابق ان اہلکاروں کی غیر حاضری کا انکشاف لارج ٹیکس آفس (ایل ٹی او) لاہور کی جانب سے کی جانے والی معمول کی مانیٹرنگ کے دوران ہوا، جس پر معاملے کی مکمل جانچ پڑتال کی گئی۔ تحقیقات میں یہ بات سامنے آئی کہ متعلقہ اہلکار اپنی تفویض کردہ ذمہ داریاں ادا کرنے میں ناکام رہے۔ایل ٹی او لاہور نے غفلت اور لاپروائی کی سنگینی کو مدنظر رکھتے ہوئے متعلقہ افسران کے خلاف تادیبی کارروائی شروع کرنے کی سفارش کی، جس پر ایف بی آر نے فوری ایکشن لیتے ہوئے معطلی کے احکامات جاری کر دیے۔
ایف بی آر کی جانب سے جاری کردہ اعلامیے میں کہا گیا ہے کہ غفلت برتنے والے اہلکاروں کو فوری طور پر معطل کر دیا گیا ہے اور معاملے کی مزید تحقیقات جاری ہیں۔ اعلامیے میں واضح کیا گیا کہ حکومت اور ایف بی آر اپنی تمام فیلڈ فارمیشنز میں نظم و ضبط، دیانتداری اور پیشہ ورانہ معیار کو برقرار رکھنے کے لیے ہر ممکن اقدام اٹھانے کے لیے پرعزم ہیں۔ایف بی آر نے مزید کہا کہ فرائض میں غفلت، بدانتظامی یا تفویض کردہ ذمہ داریوں کی عدم تعمیل کسی صورت برداشت نہیں کی جائے گی اور ایسے عناصر کے خلاف قانون کے مطابق سخت کارروائی عمل میں لائی جائے گی۔حکام کے مطابق شوگر انڈسٹری کی مؤثر نگرانی شفافیت کو یقینی بنانے اور قومی خزانے کو ممکنہ نقصان سے بچانے کے لیے نہایت اہم ہے، اسی لیے مانیٹرنگ نظام میں کسی بھی قسم کی کوتاہی پر زیرو ٹالرنس پالیسی اپنائی جا رہی ہے۔