ایف آئی اے کی کارروائی، حساس شہری ڈیٹا غیر ملکی ایجنسیوں کو فروخت کرنے والا ملزم گرفتار

‎اسلام آباد: وفاقی تحقیقاتی ادارے (ایف آئی اے) نے ایک بڑی کارروائی کرتے ہوئے پاکستانی شہریوں کی حساس معلومات مبینہ طور پر غیر ملکی خفیہ ایجنسیوں کو فروخت کرنے والے منظم ڈیجیٹل نیٹ ورک کے ایک اہم کارندے کو گرفتار کر لیا ہے۔ حکام کے مطابق ملزم سے تفتیش جاری ہے جبکہ نیٹ ورک کے دیگر ارکان کی تلاش کے لیے بھی کارروائیاں کی جا رہی ہیں۔
‎ایف آئی اے کے کاؤنٹر ٹیررازم ونگ کراچی کے مطابق ابتدائی تحقیقات میں انکشاف ہوا ہے کہ یہ نیٹ ورک نہ صرف حساس سرکاری معلومات کی غیر قانونی خرید و فروخت میں ملوث تھا بلکہ پاکستانی شہریوں کے ساتھ ڈیجیٹل مالیاتی فراڈ بھی کرتا رہا۔ حکام کے مطابق اس گروہ میں پاکستانی اور غیر ملکی دونوں افراد شامل ہیں۔
‎تحقیقات کے مطابق ملزمان نادرا، پاسپورٹ اینڈ امیگریشن ریکارڈ اور موبائل فون صارفین کی حساس معلومات حاصل کرکے انہیں مبینہ طور پر غیر ملکی خفیہ ایجنسیوں کو فروخت کرتے تھے۔ ایف آئی اے کا کہنا ہے کہ اس قسم کی سرگرمیاں قومی سلامتی کے لیے بھی سنگین خطرہ بن سکتی ہیں۔
‎حکام نے بتایا کہ ملزمان مختلف سوشل میڈیا پلیٹ فارمز کے ذریعے غیر ملکی رابطوں سے منسلک رہتے تھے، جبکہ مالی لین دین کے لیے کرپٹو کرنسی اور مختلف ڈیجیٹل والٹس استعمال کیے جاتے تھے تاکہ رقم کی منتقلی کا سراغ لگانا مشکل ہو۔
‎ایف آئی اے کاؤنٹر ٹیررازم ونگ کراچی نے جدید ڈیجیٹل تحقیقات کے ذریعے ان ڈیجیٹل والٹس کا سراغ لگایا، جس کے بعد ایک ملزم کو گرفتار کر لیا گیا۔ گرفتار ملزم کے خلاف مقدمہ درج کر کے مزید تفتیش شروع کر دی گئی ہے۔
‎ایف آئی اے کے مطابق کیس کی تحقیقات کا دائرہ مزید وسیع کیا جا رہا ہے اور نیٹ ورک سے وابستہ دیگر مقامی اور غیر ملکی ملزمان کی گرفتاری کے لیے بھی کارروائیاں جاری ہیں۔ حکام کا کہنا ہے کہ ڈیجیٹل جرائم اور حساس معلومات کے غیر قانونی استعمال میں ملوث عناصر کے خلاف سخت قانونی کارروائی عمل میں لائی جائے گی۔