راولپنڈی: چیف آف ڈیفنس اسٹاف اور آرمی چیف فیلڈ مارشل سید عاصم منیر سے گھانا کے چیف آف ڈیفنس اسٹاف لیفٹیننٹ جنرل ولیم آگیاپانگ نے جنرل ہیڈکوارٹرز (جی ایچ کیو) میں ملاقات کی، جس میں دفاعی تعاون، علاقائی سیکیورٹی اور عسکری تعلقات کو مزید مضبوط بنانے پر تبادلہ خیال کیا گیا۔
پاک فوج کے شعبۂ تعلقات عامہ (آئی ایس پی آر) کے مطابق گھانا کے چیف آف ڈیفنس اسٹاف کی جی ایچ کیو آمد پر انہیں گارڈ آف آنر پیش کیا گیا۔ بعد ازاں دونوں فوجی سربراہان کے درمیان ہونے والی ملاقات میں باہمی دلچسپی کے امور، خطے کی سیکیورٹی صورتحال اور دفاعی شعبے میں تعاون کے فروغ پر تفصیلی گفتگو ہوئی۔
آئی ایس پی آر کے مطابق ملاقات کے دوران پاکستان اور گھانا کے درمیان ملٹری ٹو ملٹری تعلقات کو مزید وسعت دینے کے عزم کا اعادہ کیا گیا۔ دونوں ممالک نے انسداد دہشت گردی کے شعبے میں مشترکہ تربیت، پیشہ ورانہ تجربات کے تبادلے اور دفاعی پیداوار میں تعاون بڑھانے پر خصوصی توجہ دینے پر اتفاق کیا۔
گھانا کے چیف آف ڈیفنس اسٹاف لیفٹیننٹ جنرل ولیم آگیاپانگ نے پاکستان کی مسلح افواج کی پیشہ ورانہ صلاحیتوں کو سراہتے ہوئے علاقائی امن و استحکام کے لیے پاک فوج کے کردار کی تعریف کی۔ انہوں نے دفاعی تعاون کو مزید فروغ دینے میں دلچسپی کا اظہار بھی کیا۔
آئی ایس پی آر کے مطابق گھانا کے قومی سلامتی کے کوآرڈینیٹر عبدالرزاق عثمان نے بھی اپنے وفد کے ہمراہ پاکستان کی عسکری قیادت سے ملاقاتیں کیں۔ اس دوران انہوں نے پاک بحریہ کے سربراہ ایڈمرل نوید اشرف اور پاک فضائیہ کے سربراہ ایئر چیف مارشل ظہیر احمد بابر سدھو سے الگ الگ ملاقاتیں کیں، جن میں دوطرفہ دفاعی تعاون، سیکیورٹی امور اور پیشہ ورانہ روابط کے فروغ پر تبادلہ خیال کیا گیا۔
فیلڈ مارشل عاصم منیر سے گھانا کے چیف آف ڈیفنس اسٹاف کی ملاقات
