فیفا ورلڈ کپ 2026 کے آغاز سے قبل ہی ایک نیا ریکارڈ قائم ہوگیا ہے۔ رپورٹس کے مطابق آئندہ سال ہونے والے فٹبال ورلڈ کپ کے مختلف میچوں کے لیے فیفا کو 50 کروڑ سے زائد ٹکٹ درخواستیں موصول ہوئی ہیں، جو اب تک کی بلند ترین تعداد ہے۔
رپورٹ میں بتایا گیا ہے کہ سب سے زیادہ مانگ 17 جون کو میامی میں ہونے والے کولمبیا اور پرتگال کے میچ کی ہے۔
واضح رہے کہ فیفا ورلڈ کپ 2026 امریکا، میکسیکو اور کینیڈا میں 11 جون سے 19 جولائی تک کھیلا جائے گا، جس میں 48 ٹیمیں شرکت کریں گی۔
فیفا کے مطابق ورلڈ کپ 2026 کی فاتح ٹیم کو 5 کروڑ ڈالر انعامی رقم دی جائے گی، جبکہ رنر اپ ٹیم کو 3 کروڑ 30 لاکھ ڈالر ملیں گے۔ اس سے قبل 2022 کے ورلڈ کپ کی فاتح ٹیم کو 4 کروڑ 20 لاکھ ڈالر کی انعامی رقم دی گئی تھی۔
فیفا ورلڈ کپ 2026: ٹورنامنٹ سے قبل ٹکٹوں کی ریکارڈ مانگ
