اوکاڑہ(نامہ نگار ملک ظفر) گورنمنٹ گریجویٹ کالج اوکاڑہ میں بی ایس پروگرام کے پہلے کانووکیشن کی پروقار تقریب منعقد ہوئی، جس میں مختلف شعبہ جات سے فارغ التحصیل ہونے والے طلبہ و طالبات کو ڈگریاں، شیلڈز اور سرٹیفکیٹس سے نوازا گیا۔تقریب کے مہمانِ خصوصی سینئر سیاسی رہنما چوہدری فیاض ظفر تھے جبکہ مہمانانِ گرامی میں ڈپٹی ڈائریکٹر کالجز ضلع اوکاڑہ پروفیسر رائے ناصر زمان، سابق پرنسپل صاحبان، پرنسپل گورنمنٹ ایسوسی ایٹ کالج آف کامرس اوکاڑہ پروفیسر رانا احسن سلیم، کالم نگار سلمان احمد قریشی اور دیگر معزز شخصیات شریک ہوئیں۔تقریب کا آغاز تلاوتِ کلامِ پاک اور نعتِ رسولِ مقبول ﷺ سے کیا گیا۔ اس موقع پر کالج کے پرنسپل پروفیسر علی حیدر ڈوگر نے سپاس نامہ پیش کرتے ہوئے کالج کی تعلیمی کارکردگی، بی ایس پروگرام کی کامیابیوں اور طلبہ و طالبات کی نمایاں کامیابیوں پر روشنی ڈالی۔ انہوں نے فارغ التحصیل ہونے والے طلبہ و طالبات اور ان کے والدین کو مبارکباد دیتے ہوئے کہا کہ اعلیٰ تعلیم ترقی یافتہ معاشرے کی بنیاد ہے اور نوجوانوں کو جدید علوم سے آراستہ کرنا وقت کی اہم ضرورت ہے۔مہمانِ خصوصی چوہدری فیاض ظفر نے اپنے خطاب میں طلبہ و طالبات کو تعلیمی سفر کی کامیاب تکمیل پر مبارکباد دی اور کہا کہ گورنمنٹ گریجویٹ کالج اوکاڑہ خطے کا ایک ممتاز تعلیمی ادارہ ہے جو نوجوان نسل کو معیاری تعلیم فراہم کر رہا ہے۔ انہوں نے کالج میں جدید تقاضوں سے ہم آہنگ نئے آئی ٹی پروگرامز اور پیشہ ورانہ کورسز کے آغاز کے لیے ہر ممکن تعاون کی یقین دہانی کرائی تاکہ طلبہ و طالبات کو عصرِ حاضر کے تقاضوں کے مطابق بہتر تعلیمی اور روزگار کے مواقع میسر آ سکیں۔ڈپٹی ڈائریکٹر کالجز پروفیسر رائے ناصر زمان نے اپنے خطاب میں کالج انتظامیہ اور فیکلٹی کی کاوشوں کو سراہتے ہوئے کہا کہ سرکاری کالجوں میں معیارِ تعلیم کو مزید بہتر بنانے کے لیے عملی اقدامات جاری ہیں اور بی ایس پروگرامز نوجوانوں کے روشن مستقبل کی ضمانت ہیں۔تقریب کے دوران نمایاں کارکردگی کا مظاہرہ کرنے والے پوزیشن ہولڈر طلبہ و طالبات میں شیلڈز، میڈلز اور اسناد تقسیم کی گئیں۔ اس موقع پر طلبہ و طالبات اور ان کے والدین نے خوشی اور مسرت کا اظہار کرتے ہوئے کالج انتظامیہ کا شکریہ ادا کیا۔ شرکاء نے کانووکیشن کے کامیاب انعقاد کو ادارے کی ایک اہم کامیابی قرار دیا۔تقریب کی نظامت کے فرائض پروفیسر چاند عقیل نے نہایت احسن انداز میں انجام دیے۔ تقریب کے اختتام پر ملکی سلامتی، ترقی، خوشحالی اور طلبہ و طالبات کے روشن مستقبل کے لیے خصوصی دعا بھی کی گئی۔
گورنمنٹ گریجویٹ کالج اوکاڑہ میں بی ایس پروگرام کے پہلے کانووکیشن کی پروقار تقریب
