امریکی میڈیا کے مطابق ایران جنگ کے بعد پہلی بار ایک فرانسیسی کمپنی کا کنٹینر جہاز آبنائے ہرمز سے بحفاظت گزر گیا ہے، جسے خطے میں بحری سرگرمیوں کی بحالی کی ایک اہم پیش رفت قرار دیا جا رہا ہے۔
رپورٹس کے مطابق شپ ٹریکنگ ڈیٹا سے ظاہر ہوتا ہے کہ مذکورہ جہاز گزشتہ روز دوپہر کے وقت دبئی سے روانہ ہوا اور ایران کی جانب سفر کرتے ہوئے قشم اور لاراک کے جزیروں کے درمیان موجود چینل سے گزرا۔
جہاز بعد ازاں بحیرہ عمان کی جانب بڑھتے ہوئے مسقط کے قریب پہنچ گیا، جس سے ظاہر ہوتا ہے کہ اہم بحری گزرگاہ میں نقل و حرکت دوبارہ بحال ہونا شروع ہو گئی ہے۔
یہ پیش رفت ایسے وقت سامنے آئی ہے جب حالیہ کشیدگی کے باعث آبنائے ہرمز میں جہاز رانی شدید متاثر ہوئی تھی اور عالمی سطح پر توانائی کی سپلائی کے حوالے سے خدشات پیدا ہو گئے تھے۔
ماہرین کے مطابق اس طرح کی سرگرمیاں بحری تجارت کے اعتماد کی بحالی میں اہم کردار ادا کر سکتی ہیں، تاہم خطے میں سیکیورٹی صورتحال بدستور حساس ہے۔
ایران جنگ کے بعد پہلا فرانسیسی جہاز آبنائے ہرمز سے گزر گیا
