سندھ کے سینئر وزیر شرجیل انعام میمن کا کہنا ہے کہ خاتون انمول نے معاشرے میں زہر پھیلانے کی کوشش کی،مفت پنک اسکوٹیز تقسیم کر کے خواتین کی ترقی کے سفر کو نئی رفتار دے دی۔
حیدرآباد میں تقریب سے خطاب کرتے ہوئے شرجیل میمن کا کہنا تھا کہ ہماری صوبائی گورنمنٹ کا ایکشن قابلِ تحسین ہے، سندھ بھر میں منشیات کے خلاف آپریشن ہو رہا ہے، ہم صوبے سے منشیات کا خاتمہ کریں گے، خواتین کو ٹریننگ، لائسنس اور فری میں اسکوٹی دی جا رہی ہے، پاکستان واحد ملک ہے جہاں مفت میں اسکوٹی دی جا رہی ہے، میرٹ کے مطابق خواتین میں اسکوٹیز تقسیم کی جا رہی ہیں،وکلاء خواتین کو بھی پنک اسکوٹی مفت دی جائے گی، ہم نے خواتین کے لیے الگ بسیں شروع کی ہیں، اگر سستی بجلی بن سکتی ہے تو وہ کوئلے سے بن سکتی ہے، حکومتِ سندھ نے تمام بڑے پروجیکٹ دیے ہیں، سندھ بھر میں سفری سہولتیں دی جائیں گی.
شرجیل میمن کا مزید کہنا تھاکہ محترمہ فریال تالپور کی ہدایات پر منشیات کے خلاف جاری آپریشن خوش آئند اقدام ہے۔ انہوں نے عزم ظاہر کیا کہ سندھ کو منشیات سے پاک بنا کر نوجوان نسل کا مستقبل محفوظ بنایا جائے گا۔
رکن صوبائی اسمبلی امداد پتافی نے کہا کہ آج حیدرآباد میں اس شاندار تقریب میں شرکت کرکے دلی خوشی محسوس ہوئی۔جس انداز میں محکمہ ٹرانسپورٹ پورے صوبے میں بلا تفریق عوامی خدمت انجام دے رہا ہے، وہ قابلِ تحسین ہے۔ اس کامیاب وژن کو عملی شکل دینے میں شرجیل انعام میمن خصوصی داد کے مستحق ہیں، جو پاکستان پیپلز پارٹی کے منشور پر محنت، لگن اور خلوص کے ساتھ عمل پیرا ہیں۔حیدرآباد ہمیشہ سے پاکستان پیپلز پارٹی کا مضبوط قلعہ رہا ہے، اور اس شہر سے جن عوامی و جمہوری تحریکوں نے جنم لیا، ان کی مثال کہیں اور نہیں ملتی.