ایبٹ آباد میں پبلک ہیلتھ اسکول میں گیس لیکیج کے باعث 17 طالبات بے ہوش ہو گئیں، جن میں سے 5 کی حالت تشویشناک بتائی جا رہی ہے۔ واقعے کے بعد تمام متاثرہ طالبات کو فوری طور پر ایوب ٹیچنگ اسپتال منتقل کر دیا گیا۔
اسپتال ذرائع کے مطابق ایک طالبہ کو میڈیکل آئی سی یو میں داخل کیا گیا ہے، دو طالبات سی سی یو، ایک میڈیکل وارڈ سی جبکہ دیگر طالبات کو ایمرجنسی آبزرویشن میں رکھا گیا ہے۔
اسکول انتظامیہ کا کہنا ہے کہ قریبی گلی میں گیس لیکیج ہوئی، جس کے باعث گیس کلاس روم میں بھر گئی اور طالبات کی طبیعت بگڑ گئی۔
واقعے کے بعد اسکول میں خوف و ہراس پھیل گیا جبکہ انتظامیہ اور متعلقہ اداروں کی جانب سے تحقیقات کا آغاز کر دیا گیا ہے۔
ایبٹ آباد: اسکول میں گیس لیکیج، 17 طالبات بے ہوش
