صدر واہ پولیس نے ایک کامیاب کارروائی کرتے ہوئے غیر ملکیوں کو اغواء کرنے والے تین اغواء کاروں کو صرف 24 گھنٹوں میں گرفتار کر لیا۔ اس کارروائی میں تینوں مغویوں کو بحفاظت بازیاب کر لیا گیا۔
گرفتار ملزمان کی شناخت اجمل، بلال، اور عبداللہ کے نام سے ہوئی ہے۔ مغویوں میں ایک افغان فیملی کی خاتون اور ان کے دو نوجوان بیٹے شامل ہیں۔ ملزمان نے افغانستان سے آنے والی فیملی کو یورپی ملک کا ویزہ دلوانے کے بہانے بلا کر اغواء کیا تھا۔واقعہ کی اطلاع ملنے پر سی پی او سید خالد ہمدانی نے فوری طور پر نوٹس لیتے ہوئے مغویوں کی بازیابی اور ملزمان کی گرفتاری کے احکامات جاری کیے۔ اس کے بعد ایس پی پوٹھوہار کی سربراہی میں خصوصی ٹیمیں تشکیل دی گئیں۔
پولیس نے متعدد سی سی ٹی وی کیمروں کی فوٹیج اور ہیومن انٹیلی جنس کے ذریعے ملزمان کو ٹریس کیا اور انہیں گرفتار کر لیا۔سی پی او سید خالد ہمدانی نے ایس پی پوٹھوہار، ایس ڈی پی او ٹیکسلا، ایس ایچ او صدر واہ اور ان کی ٹیم کو مغویوں کی فوری بازیابی اور ملزمان کی گرفتاری پر شاباش دی۔سی پی او نے کہا کہ ملزمان کو ٹھوس شواہد کے ساتھ چالان کر کے انہیں قرار واقعی سزا دلوائی جائے گی۔یہ کارروائی صدر واہ پولیس کی جانب سے ایک اہم کامیابی ہے جو اغواء کے خلاف سخت اقدامات کی عکاسی کرتی ہے۔